Siglir tar il cuntegn
cuntegn

Chantun Anc 365 dis: Tgi remplazza Janom Steiner e Jäger?

Ils 10 da zercladur 2018 elegia il Grischun ina nova regenza. Cler è che Barbara Janom Steiner (PBD) sto chalar e che Martin Jäger (PS) vul chalar. Tgi succeda ad els? In'analisa – exact in onn avant las elecziuns grischunas.

Las duas partidas che ston remplazzar lur cussegliers guvernativs (PS e PBD) han gia mess las cartas sin maisa. Las ulteriuras partidas spetgan anc e communitgeschan lur candidats per la regenza pir l'atun 2017 u il cumenzament dal 2018.

Il maletg mussa il logo da la PS
Legenda: RTR

«Schanzas intactas»

Cun sias pre-elecziuns va la Partida socialdemocratica dal Grischun la via americana per tschertgar la successiun da Martin Jäger. Ils 25 da zercladur croda la decisiun tranter Peter Peyer ed Andreas Thöny. Actualmain para Peter Peyer d'avair avantatgs.

Il maletg mussa il logo da la PBD
Legenda: RTR

«In sez balucca»

Tegnair dus sezs en la regenza è ina gronda sfida per ils burgais-democratics. Sper il cusseglier guvernativ actual Jon Domenic Parolini candidescha Andreas Felix (mainafatschenta dals impressaris grischuns). La PBD sto rimnar bleras vuschs – quellas che Barbara Janom Steiner rimnava enfin ussa.

Il maletg mussa il logo da la PPS.
Legenda: RTR

«In'ulteriura emprova»

I vegn speculà che Walter Schlegl (cumandant da la polizia chantunala) avess interess da candidar. El stuess ir en la cursa cunter ses schef, Christian Rathgeb. Quai fa endament l'onn 2010, cura che Heinz Brand aveva candidà encunter sia scheffa Barbara Janom Steiner. La PPS pudess dentant era vegnir cun ina dunna u cun ina surpraisa.

Il maletg mussa il logo da la PCD
Legenda: RTR

«A la tschertga d'in segund candidat»

Cunquai ch'il cusseglier guvernativ Mario Cavigelli vegn probablamain reelegì, ha la Partida cristiandemocratica mustgas da recaltgar in segund sez en la regenza grischuna. Ils candidats pussaivels: Alessandro Della Vedova (president communal Poschiavo) e Marcus Caduff (directur dal Spital regiunal Surselva).

Il maletg mussa il logo da la PLD
Legenda: RTR

«Strategia offensiva u defensiva?»

Er il cusseglier guvernativ dals liberals, Christian Rathgeb, dastga quintar cun ina reelecziun. Anc avert è sche la PLD ristga da purtar in segund candidat u sch'ella spetga enfin las elecziuns 2022, cura che Christian Rathgeb sto chalar. Interess pudessan avair Urs Marti (president da Cuira) e Rudolf Kunz (schef da fracziun PLD).

Segund scrutini pussaivel

Dapli persunas che candideschan per la regenza e pli gronda è la probabilitad d'in segund scrutini. Quel fiss lura trais emnas suenter l'elecziun, ils 1. da fanadur 2018.

Dumengia ils 10 da zercladur 2018 na vegn betg mo elegì la regenza, mabain era il parlament grischun, pia 120 deputadas e deputads dal Cussegl grond.

RR actualitad 08.00