Anc 114 vischnancas a partir dal 2016

Il chantun Grischun dumbra a partir dal 2016 anc 114 vischnancas. Oz ha il Cussegl Grond approvà gist 4 projects da fusiun. Sper la fusiun da las 9 vischnancas dal Surses ha il Cussegl Grond era approvà las fusiuns da Luzein e St. Antönien, Saas cun Claustra-Serneus e Sursaissa cun Mundaun.

La fusiun dal Surses.

Legenda da maletgs: Il Cussegl grond ha approva la fusiun dal Surses. RTR

La nova vischnanca Surses po ir en vigur l’entschatta dal 2016. Senza cuntravuschs ha il Cussegl Grond approvà la fusiun da las 9 vischnancas dal Surses. (Beiva, Cunter, Marmorera, Mulegns, Riom-Parsonz, Salouf, Savognin, Sur e Tinizong-Rona) Il suveran da las 9 vischnancas ha gia approvà la fusiun la fin mars e la fin avrigl da quest onn. La vischnanca fusiunada cun ver 2400 abitants survegn ina contribuziun da promoziun dal chantun dad 8.8 milliuns francs.

Sco commember da la cumissiun da la fusiun ha il socialdemocrat Jon Pult en ses pled avant il Cussegl grond mess paisa sin la situaziun linguistica en la nova vischnanca che cumpiglia ina maioritad rumantscha ed minoritad tudestga e taliana. Quai haja el era sentì en las sesidas da la cumissiun. Là saja sa radunada, tranter auter cun la Cussegliera guvernativa Barbara Janom Steiner, ina maioritad rumantscha – las discussiuns sajan però tuttina vegnidas fatgas per tudestg.

Da quai privel stoppia il parlament Grischun savair, ha Jon Pult affirmà sia admoniziun. Sa fatschentar cun la schliaziun stoppian dentant ils responsabels en las vischnancas.

Fusiun Sursaissa e Mundaun

Approvada dal Cussegl Grond è era la fusiun da Sursaissa e Mundaun. Senza cuntravuschs ha il parlament grischun dà il consentiment per questa fusiun che vegn remunerada cun ina contribuziun dad 1.9 milliuns francs dil chantun. La fusiun da Sursaissa e Mundaun va en vigur l’entschatta 2016.

Fusiun Claustra-Serneus e Saas

La vischnanca da Saas en Partenza vegn integrada en la vischnanca da Claustra-Serneus. Questa fusiun va en vigur l’emprim da schaner, quai suenter ch’il Cussegl Grond han ditg gea a questa fusiun oz. La vischnanca fusiunada po far quint cun ina contribuziun da 3.3 milliuns francs dal chantun.

Fusiun vischnanca Luzein

Era en vigur sin l’entschatta dal onn va la fusiun da St. Antönien e Luzein tar la nova vischnanca Luzein. Il parlament grischun ha approvà unanimamain questa fusiun da las duas vischnancas en Partenza, che dumbra da nov prest 1’600 abitants. Il chantun remunerescha questa fusiun cun ina contribuziun dad 1.75 milliuns francs.

RR novitads 15:00