Dapi l'onn 2010 han pajataglias en il chantun Grischun Chur tradì a las autoritads 742 milliuns francs ch'eran betg stà suttapost a la taglia. La Confederaziun, il chantun e las vischnancas han incassà uschia dapi lura totalmain 47 milliuns francs taglia supplementara.
Resursas persunals per elavurar ils dossiers
Sin la dumonda sch'il chantun haja avunda resursas da persunal per elavurar ils dossiers da taglia pertutgads, respunda la regenza ch'i haja dà in ferm augment da las autodenunzias l'onn passà. E che las pendenzas sajan uschia creschidas considerablamain. Quellas na possian betg vegnir liquidadas dal persunal existent. La regenza vegnia perquai ad examinar sch'i fetschia basegns da crear ina plazza temporara u d'occupar dublamain ina plazza che vegn libra l'onn proxim en consequenza d'in pensiunament.
Amnestia fiscala pitschna en Svizra
Dapi il prim da schaner 2010 è l'amnestia fiscala pitschna en vigur en Svizra. Tgi che denunzia in'atgna omissiun fiscala, sto pajar taglias supplementaras ed in tschains da retard per ils ultims 10 onns. En cas d'ierta vegnan resguardads ils ultims trais onns avant la mort. In'autodenunzia nunchastiabla sin fundament da l'amnestia fiscala pitschna po vegnir fatga mo ina giada.
Amnestia fiscala pitschna en il chantun Grischun
| Onn | Dumber d'autodenunzias | Taglia supplementara chantun | Taglia supplementara vischnancas |
| 2010-13 | 447 | 7 332 000 | 6 674 000 |
| 2014 | 205 | 2 581 000 | 2 519 000 |
| 2015 | 209 | 3 337 000 | 2 935 000 |
| 2016 | 290 | 3 058 000 | 2 705 000 |
| 2017 | 879 | 4 040 000 | 3 766 000 |
| Total | 2030 | 20 348 000 | 18 599 000 |
RR novitads 10:00