Siglir tar il cuntegn

Header

Navigaziun

Legenda: Guardar il video L'ultima giada a chatscha cun iva?. Durada 02:13 minutas.
Or da RTR dals 29.09.2016.
cuntegn

Chantun Alcohol procura per chaus cotschens

L’ultim di da chatsch'auta senza cunfin da promils – quai pudess valair per oz, sch’i va tenor la regenza grischuna. Quella propona numnadamain en ses messadi per ina revisiun parziala da la lescha da chatscha, d'introducir in cunfin da promils per chatschaders.

Sch’i va tenor la regenza, duai valair a partir da l’onn che vegn sin ils trutgs da chatscha las medemas reglas per il consum d'alcohol sco sin via.

Ils chatschaders sa dostan

La discussiun davart il tema alcohol e chatschaders procura adina puspè per chaus cotschens. Durant ch’els sajan vairamain sin chatscha u sajettan sin in animal na saja quai insumma nagin problem, sa dosta Robert Brunold. El è president dals chatschaders da patenta en il Grischun.

Ad el na saja betg enconuschent in unic accident da chatscha pervi da memia bler alcohol. Ils chatschaders hajan in aut senn da responsabladad. Tge ch’els fetschian en tegia saja lur chaussa – sco tar tut ils auters che fan festa era.

La constataziun dal pli aut chatschader grischun conferma era la polizia. Ad ella na saja betg enconuschent in unic cas, di la pledadra da medias Anita Senti.

Il clima è vegnì pli criv per la chatscha

Il stumpel a la proposta guvernamentala ha dà l’iniziativa per ina chatscha etica e cumpatibla cun la natira. Las suttascripziuns necessarias per quest’iniziativa - vaira critica envers la chatscha – eran vegnidas ensemen en temp da record.

La chatscha procura bain adina puspè per chaus cotschens. Che la critica s’exprima en iniziativas mussa dentant, che la discussiun è s’intensivada. L’iniziativa e la proposta da la regenza per ina revisiun parziala da la lescha da chatscha duajan vegnir tractadas en la sessiun dals 16 enfin ils 19 d'october.