Siglir tar il cuntegn

Header

cuntegn

Chantun Aixa Andreetta fa part da project per promoziun da cultura

Il cusseglier guvernativ Martin Jäger reagescha sin la critica e cloma Aixa Andreetta da la cumissiun da cultura sco represchentanta dal Grischun talian en la gruppa da project per la promoziun da la cultura.

Ussa è il Grischun talian tuttina represchentà en la gruppa ch'elavura in project per la promoziun da la cultura en il Grischun. Suenter critica ed in'incumbensa ch'il deputà Ilario Bondolfi ha inoltrà a la regenza, ha il cusseglier guvernativ Martin Jäger clamà danov Aixa Andreetta da la cumissiun da cultura chantunala en la gruppa da project.

Ilario Bondolfi è cuntent che Aixa Andreetta fa part da la gruppa da project. Sco el ha declerà envers il schurnal regiunal da SRF saja tuttina spezial, ch'ins haja stuì inoltrar in'incumbensa per cuntanscher ch'era il Grischun talian saja represchentà en questa gruppa.

La gruppa da project ha d'analisar la situaziun actuala da la promoziun da la cultura e definir puncts centrals e mesiras per cuntanscher las finamiras. La regenza quinta da suttametter il concept finì al Cussegl grond en radund 2 onns.

La gruppa da project sa cumpona da nov pia dad 8 persunas: Dasper cusseglier guvernativ Martin Jäger sco mainaproject, Rita Schmid sco manadra da project externa, èn era da la partida Barbara Gabrielli la manadra da l'uffizi da cultura, Aixa Andreetta, Gianna Olina Cadonau e Christian Albrecht, manader da la cumissiun chantunala da cultrua, Andreas Leisinger, il president da l'Uniun da museums grischuns sco era Nikolaus Schmid, il president da la federaziun professiunala da persunas dal teater.

RR novitads 12:00

Artitgels legids il pli savens