Siglir tar il cuntegn

Chantun Agroturissem è ina schanza ma er ina sfida

Far trekking cun chauras u lamas, durmir en il strom u vender agens products en l'atgna butia - tut quai è agroturissem. Per bains purils è l'agroturissem ina schanza per dapli entradas. El è dentant er ina sfida. Chattar avunda temp per ils giasts n'è betg adina simpel.

Cira set uffants van in davos l'auter cun lur lamas - trekking cun lamas.
Legenda: Trekking cun lamas - er quai è agroturissem. Keystone

L'agroturissem è fitg vast. I dat purs che fan fitg professiunal agroturissem cun per exempel affittar chombras ed avair entiras salas per servir ils giasts. I dat dentant er purs che porschan simplamain ina pitschna stizun cun agens products. Tut quai è dentant agroturissem. La dumonda quant professiunal ch'il pur po far agroturissem schai tar las resursas. Ha el il temp da servir ils giasts, respunder dumondas, mussar ad els il bain puril e spassegiar cun chauras e lamas per la cuntrada? U ha il pur da far avunda cun ses bain puril?

Agroturissem renda

Senza agid vegn quai grev, uschia Carelia Joos. Ella fa sezza agroturissem cun agid da ses um e dals geniturs da ses um. Uschia funcziunia quai fitg bain di Joos. Senza ils geniturs vegnia quai dentant pli difficil. Ins na dastgia dentant betg emblidar che l'agroturissem portia entradas supplementaras e ch'ils purs pon gudagnar in bel daner da satg cun far tschertas purschidas en quest sectur.