Las organisaziuns d’agid or da divers pajais èn sin viadi en il Nepal. La Svizra ha tramess ina gruppa da 6 persunas per guardar co pudair gidar. Enfin che quella gruppa enturn il delegà dal Cussegl federal Manuel Bessler ha evaluà la situaziun ston las organisaziuns d’agid svizras spetgar.
Quai fa mal da simplamain spetgar qua cur ch’ins sa che la glieud duvrass nus. Ils mauns èn liads, nus na pudain far nagut auter che spetgar.
Pronts aifer 3 fin 4 uras
Uschia era Redog, in’organisaziun ch’è spezialisada sin salvar persunas cun chauns. Tenor Walter Caprez, il president da Redog Grischun, saja la truppa cun 12 chauns, lur patruns e 10 gidanters, semtgà entaifer 3 fin 4 uras a Kloten per sgular en direcziun Nepal.
Walter Caprez quinta dentant ch’i saja gia memia tard. Els sajan spezialisads da salvar en l’emprim mument.
Enfin uss n’avessi tenor Caprez fatg nagin senn dad ir a Nepal, perquai ch’i n’è betg pussaivel da cuntanscher ils lieus pertutgads.
