La PBD vuleva integrar pli fitg il Cussegl grond en la lavur da tschertgar impuls per segidar cun l'economia e cun il turissem durant la crisa da corona. Uss saja numnadamain uschia, che las organisaziuns d'economia e turissem fetschian propostas che la regenza mettia lura enturn – senza che las deputadas ed ils deputads dal Cussegl grond possian prender influenza ubain er purtar ina vista d'ordaifer en las mesiras. Quai na saja betg democratic, crititgescha Oliver Hohl da la PBD.
Dovra memia bler temp
Ina part da las deputadas han bain sustegnì la PBD, dentant n'hai betg tanschì. Ils arguments da la regenza èn stads pli ferms: La regenza saja gia dapi l'entschatta da la crisa da corona vid elavurar mesiras, e veglia er cuntinuar cun sia lavur. Laschar decider er anc il Cussegl grond sur da mesiras dovria temp – e quest temp na saja en la situaziun actuala betg avant maun. Ultra da quai haja il Cussegl grond bain er in pled en chaussa, numnadamain sche las mesiras dovrian midadas da la lescha u tar credits che la cumissiun da gestiun haja da discutar, ha cusseglier guvernativ Marcus Caduff argumentà.
