Disvaris en la tgira da monuments
Las pli grondas letras grassas ch'han da far cun l'Uffizi da cultura dal Grischun hai dà ils ultims onns betg en connex cun il museum d'art mabain oravant tut cun la tgira da monuments. Ils ultims tschintg onns ha la tgira da monuments midà trais giadas ses schef.
Fin il 2012 aveva Marcus Casutt manà durant quatter onns quest uffizi sco successur da Hans Rutishauser ch'è ì en pensiun. Abditgà ha Casutt lura il 2012 ord in tschert frust. Letras grassas hai dà perquai che Casutt ha attatgà fitg l'Uffizi da cultura e sia scheffa Barbara Gabrielli. Quai ha el fatg publicamain en in'intervista cun la gasetta Südostschweiz il mars 2012. Casutt ha crititgà las structuras. Tranter auter avess el giavischà dapli cussegliaders regiunals. Barbara Gabrielli ha replitgà a Casutt che las structuras eran enconuschentas a Casutt gia avant ch'el haja surpiglià ses post.
Da Casutt tar Menghini e lura tar Berger
Suenter Marcus Casutt è vegnì Giovanni Francesco Menghini a la testa da la tgira da monuments. Lez è stà unfis gia suenter strusch dus onn. La primavaira 2014 ha el bandunà il post. El era dischillusiunà che la tgira da monuments giogia sulet ina rolla marginala. Dapi il 2014 è Simon Berger il tgirader da monuments chantunal, dapi lura èsi vegnì quiet en questa partiziun.
Dissonanzas er en la biblioteca chantunala
Strusch che Barbara Gabrielli ha cumenzà si'incumbensa sco scheffa da l'Uffizi da cultura dal Grischun ha demissiunà il bibliotecari chantunal, Wolfgang Giella. Questa demissiun n'ha dentant strusch da far cun la nova scheffa da l'uffizi. Dapi che Giella ha surpiglià ses post da manader da la biblioteca chantunala ha el cumbattì per diversas chaussas. El era stanchel da stuair ir adina puspè tar Pieder e Paul per chattar la dretga persuna responsabla per ses giavischs. Tenor Giella n'eran las structuras internas da l'uffizi betg bunas, el aveva l'impressiun ch'el na vegnia betg giu dal flatg.
Resguardant ch'i ha dà ils ultims 8 onns sulet 3 cas ch'èn vegnids en las medias, na pon ins betg dir chi dettia adina puspè disvaris en l'Uffizi da cultura, quai è plitost in'impressiun. La critica actuala vid la degradaziun dal directur dal museum d'art è vehementa plitost pervi da la decisiun sco tala sco era pervi da la moda d'avair communitgà la decisiun. En il focus da la critica è il directur dal departament, Martin Jäger e betg exnum la manadra da l'Uffizi da cultura.
RR actualitad 17:00