Siglir tar il cuntegn
Inhalt

Chantun Aderents perplex – Adversaris cuntents …

Cun bun 60% «na» è la resposta dals Grischuns davart ina candidatura per gieus olimpics 2026 clera. Schebain che las bleras partidas en il Grischun èn stadas per ils gieus olimpics, il suveran è stà d'in autra opiniun.

Legende: Video Discussiun d'aderents ed adversaris abspielen. Laufzeit 05:23 Minuten.
Or da Telesguard dals 12.02.2017.

Il chantun Grischun na vegn betg ad elavurar ina candidatura per ils gieus olimpics d'enviern 2026. La regenza deplorescha bain il na cun 60,1%, puntuescha però ch'i saja d'acceptar la decisiun dal suveran grischun.

Adversaris cuntents discurran da «sforz»

Il suveran grischun ha pia definitivamain ditg na al credit da 25 milliuns francs. La Partida socialdemocratica (PS) ed il comité cunter gieus olimpics 2026 èn satisfatgs dal cler na da la populaziun grischuna. Silva Semadeni ch'è en quest comité crai ch'i saja surtut stà il sforz che haja manà a questa decisiun. Suenter quatter onns anc ina giada turnar cun la medema idea, quai na fetschia nagin senn.

Aderents na pon betg chapir il resultat

Lorenzo Schmid, president communal d'Arosa na po betg chapir la decisiun. La populaziun n'haja qua simplamain betg gì la perspectiva per il futur. Gist da las vischnancas che fissan stadas involvadas femamain sco San Murezzan, Tavau ed Arosa saja el trumpà.

Era l’uniun d'artisanadi e mastergn dal Grischun deplorescha il resultat da la votaziun. Els èn da l’avis ch’il Grischun dettia davent uschia ina buna schanza da promover il chantun ils proxims onns. La gronda part da la populaziun vesia quai auter. Cun il na per la candidatura Grischuna survegnia uss il project dal Valais meglras schanzas.

RR novitads 13:00