La nova rait 5G è concepida per transferir datas digitalas enorm spert, senza latenza e senza sperdita da qualitad. Quella rait vegn era numnada «la rait da l'internet da las chaussas». 5G pussibilitescha numnadamain da colliar blers apparats e sistems tecnics in cun l'auter. La tecnica survegn pia tras il 5G la pussaivladad da survegnir intelligenza artifiziala, quai ch’è enfin ussa betg stà pussibel cun la rait da 4G.
Per consuments privats e lur diever dal mintgadi tanscha dentant per gronda part la rait actuala da telefonia mobila da 4G.
Tge pon ins far concret?
- Intginas operaziuns vegnan ins grazia a las colliaziuns spertas da 5G a pudair manar atras da lunsch davent. In medi a Turitg po pia operar in pazient a Cuira – mo tras visurs e cun agid da tecnica da virtual reality.
- Ins vul colliar il traffic ed ils autos cun la rait da 5G. Ils sensurs d'autos badan cun quest sistem pli spert, tge che capita davant e davos e pon uschia automaticamain reagir pli baud en cas da privel d'accident u colonnas – per part schizunt autonom.
- Discurs u conferenzas sur video u telefon èn cun 5G in toc pli sperts. Per il mument sto ins anc spetgar, fin ch'il partenari da discussiun ha insumma udì, tge ch'ins ha ditg. Sche tuts dus han ina colliaziun da 5G duess quai dentant ir sco tar in discurs dad in ad in.
RR actualitad 07:00