Siglir tar il cuntegn

Header

Navigaziun

Fotogragia da la büvetta a Nairs.
Legenda: Ina da las fundaziuns è la büvetta a Nairs. RTR, R. Mayer
cuntegn

Chantun 450 fundaziuns cun ina facultad da passa 2 milliardas

Stgars 450 fundaziuns d'interess public han lur sedia en il chantun Grischun, 380 da quellas vegnan survegliadas dal chantun.

Tut las fundaziun ensemen han ina facultad da var 2,4 milliardas francs. Bun la mesadad da talas cun sedia en il Grischun sa deditgeschan a las tematicas cultura e sustegn en general, las autras sa deditgeschan a l'art, a la promoziun dal sport, a la scienzia u er a la litteratura. Vitier vegn che la gronda part da las chasas da vegls e da tgira èn organisadas sco fundaziuns.

Nagin ha in dretg sin ina contribuziun d'ina fundaziun

Mintga fundaziun ha ina finamira e be per questa finamira pon ils raps vegnir dads ora. Mintgina po dentant decider sezza tgi u tge projects, instituziuns u organisaziuns ch'ella vul sustegnair cun tge contribuziun. Auter che per exempel tar ina cassa da pensiun, ch'è organisada sco fundaziun, n'ha nagin in dretg sin ina contribuziun d'ina fundaziun.

Project per fundaziun collectiva

L'onn che vegn vul il chantun Grischun metter en pe ina usche numnada fundaziun collectiva d'interess public. Quella duai porscher suttetg a diversas sut-fundaziuns e surpigliar l'administraziun. L'avantag è tenor Gianmarco Crameri, manader da la suvaglianza chantunala da fundaziuns, evidenta. Las fundaziuns pon dad ina vart dar giu l'administraziun e da l'autra vart spargnar raps, cun quai che tut ils custs vegnan partids si sin tut las sut-fundaziuns. (rtr/mü)