En il rom da la discussiun sur dal rapport da gestiun e quint statal da l'onn 2015 ch'è vegni prendì per enconuschientscha ha il Cussegl grond er decidì sur dad in credit supplementar da 4,5 milliuns francs per introducir il plan d'instrucziun 21. Il credit è vegni approvà cun 90 cunter 18 vuschs.
La gronda part per scolaziun da scolastas e scolasts
Sco cusseglier guvernativ Martin Jäger di, saja la gronda part dal credit per finanziar la scolaziun supplementara da las persunas d’instrucziun. En il plan d’instrucziun 21 èn prevesids trais novs roms, numnadamain l’orientaziun professiunala, medias ed informatica sco er religiun e cuminanza. E per quels roms hajan scolastas e scolasts da far scolaziun avant l’introducziun dal plan d’instrucziun 21. Planisà è d'introducir il plan l’onn da scola 2018/19.
RR novitads 12:00