Il cumenzament dal zercladur 2018 ha lieu a Chiavenna e conturn la Festa da chant dal Grischun. E sco ils organisaturs scrivan, han els survegnì las annunzias da 83 chors da la Svizra, en tut 2'442 chantadurs e chantaduras. E cun las annunzias ord l’intschess talian possian els gia prevesair bun 4’000 vuschs ch’arrivan en Valchiavenna.
Era vuschs giuvnas
A la festa da chant sa participeschan tenor ils organisaturs era plirs chors da giuvenils. En lur communicaziun numnan els il Coro Giovanile Italiano, il Chor svizzer da giuvenils ed il Chor da giuvenils grischun.
Ils organisaturs prevesan da transportar chantadurs e chantaduras gratuitamain cun bus pendulars als lieus da las represchentaziuns.
RR novitads 20:00
