Siglir tar il cuntegn

Header

cuntegn

Chantun 31,4 milliuns enstagl da 15,9 milliuns da la banca naziunala

Il chantun Grischun survegn enstagl dals 15,9 milliuns francs budgetads 31,4 milliuns francs da la Banca naziunala svizra. Pervia dal gudogn da record da 54 milliardas francs survegnan chantuns e Confederaziun numnadamain be mo ina milliarda, mabain duas.

audio
Saira: Pajament BNS al Grischun
ord Actualitad dals 09.01.2018.
laschar ir. Durada: 2 minutas 16 Secundas.

En sasez aveva il chantun Grischun quintà cun ina contribuziun da la Banca naziunala svizra da 15,9 milliuns francs. Cunquai che quella ha fatg in gudogn da 54 milliardas, paja ella uss dentant er ora dapli als chantuns: Enstagl dad ina milliarda francs survegnan chantuns e Confederaziun duas milliardas.

E perquai datti era quasi dubel uschè bler per il chantun Grischun, numnadamain 31,4 milliuns francs, uschia la cussegliera guvernativa responsabla Barbara Janom Steiner. Quai saja, sa chapescha, fitg legraivel.

Sch'jau poss terminar la lavur cun in resultat positiv er anc il 2018 fiss quai flot ed jau avess plaschair.
Autur: Barbara Janom Steiner cussegliera guvernativa

Deficit pli pitschen

Pervia da quels 15,5 milliuns francs supplementars sa sminuescha er il deficit dal budget. Tar quel èsi numnadamain anc calculada ina contribuziun da mo 15,9 milliuns francs, ed uschia in deficit da 22,8 milliuns francs. Cun ils milliuns supplementars sa sminuescha il deficit dentant sin 7,3 milliuns, ha declerà Barbara Janom Steiner envers RTR. E forsa dettia quai lura schizunt anc in quint cun in plus la fin da l'onn.

Chantun resta modest

Quella buna situaziun actuala na muntia dentant betg ch'ins budgetescha er ils proxims onns cun uschè blers daners. Er en il futur vegnia quintà cun radund 16 milliuns francs da la Banca naziunala, uschia la ministra da finanzas. Sch'i dettia lura dapli, sa sminueschia il deficit u creschia il gudogn – e da quai possian lura tuts profitar.

RR novitads 12:00

Artitgels legids il pli savens