Cun l'emprim d'avrigl è tut a fin. El surdat la direcziun da l'uffizi da construcziun bassa a Reto Knuchel. A Heinz Dicht restan las regurdientschas. Durant sia èra èn 22 tunnel e 12 sviaments vegnids realisads. Sco lavur pli pretensiusa restia en memoria la sanaziun dal tunnel dal San Bernardino. Betg la pli emoziunala, dentant la pli pompusa, l'avertura dal sviament da Claustra en preschientscha da Prinzi Charles e l'anteriur minister da traffic Moritz Leuenberger.
1400 kilometers vias chantunalas
Vias, las avainas da vita dal chantun. Onn per onn 300 milliuns francs ha Heinz Dicht gì a disposiziun per la rait da vias. Bajegiar e sanar ed il medem mument laschar circular ils autos, ina pulita sfida ch'è creschida marcantamain. Durant ils 30 onns sco schef da las vias grischunas saja il traffic sa dublegià. Dapli traffic, dapli canera ed en quest mument è dapli giavischs per sviaments.
Gugent anc realisà a fin
I saja uschia che tar il chantun saja cun 65 onns a fin, lura saja dad ir en pensiun. Gugent fiss Heinz Dicht anc stà da la partida tar la realisaziun dal project da guntgida Schmitten e Santa Maria. Quai fan uss auters. Mintga tschancun da via ch'el fa davent dad uss, na pli cun il pensar dal priminschigner, mabain be pli cun sa regurdar.