I ha dà referats d’input e workshops davart il tema: digitalisaziun dal mountainbike. En il focus eran ils e-mountainbikes. Er envidadas eran las destinaziuns turisticas.
Il svilup dals e-mountainbikes
Ils e-mountainbikes vegnan adina pli populars. Las stizuns en il chantun Grischun conferman in augment da dumondas ed ellas hajan vendì questa stad dapli e-mountainbikes che l’onn passà. Cun l’e-mountainbike na dovr’ins betg exnum cundiziun per ir en las muntognas cun velo ed ins po cuntanscher rutas pli grevas.
Ina reacziun sin il trend dad e-mountainbikes
In participant è Claudio Daguati, il responsabel per il sectur bike en il territori Scuol, Samignun e Val Müstair di ch’i dettia adina dapli e-mountainbikers en la regiun da l’Engiadina Bassa. L’interess na saja dentant anc betg uschè grond ch’els hajan adattà la purschida spezialmain per ils e-mountainbikers. Ils hotels stuessan porscher staziuns da chargiar. El e vegnia al congress per guardar tge trends ch’i dettia sin il martgà. Dentant vul el era persequitar il svilup e spetgar giu avant che reagir.
Situaziun tar las destinaziuns da turissem en il Grischun
Ir cun mountainbike en il Grischun è fitg attractiv – en cumparegliaziun cun auters chantuns en Svizra è il svilup en il Grischun il pli lunsch. Il Grischun haja bunas rutas ed ina buna infrastructura. In bun exempel è Lai, che promova exemplaricamain il sport da mountainbike. I dettia dentant era destinaziuns che na fetschian betg diever dal potenzial avant maun. Las regiuns pitschnas, per exempel la Val Müstair, dormian anc.
Immens potenzial per turissem da stad
Il sport da mountainbike haja in immens potenzial per il turissem da stad, di Darco Cazin. El è fundatur dad Allegra Turissem AG, in’interpresa che sviluppescha rutas da mountainbike e che cusseglia destinaziuns turisticas sin l’entir mund. Ed el di era ch’il Grischun na dastgia betg manchentar da reagir sin il trend dad e-mountainbikes. I saja impurtant da construir ina infrastructura per ils mountainbikes motorisads. Guardar co che las differentas destinaziuns reageschian sin il trend e quant spazi ch’ellas dettian a la nova attracziun sportiva dals e-mountainbikes.