Siglir tar il cuntegn

Header

cuntegn

2'700 uniuns En il Grischun datti da tuttas sorts uniuns

Tut en tut datti enturn 100'000 uniuns en Svizra. Er en il Grischun e cunzunt en la Rumantschia han las uniuns ina gronda muntada. Bleras suondan ad ina finamira sco chantar, sport ni giugar teater. Dentant datti era bleras uniuns cun ina finamira nunusitada.

Tenor l’uffizi federal da statistica datti en l’entira Svizra enturn 100’000 uniuns. Circa 40% da la populaziun da la Svizra fa part ad ina da quellas. L’idea da fundar uniuns va enavos en il 17. tschientaner nua ch’i ha dà las emprimas uniuns. Ellas prestan lavur d’integraziun. Ellas lian persunas cun sumegliants interess, ellas promovan cuminanzas ed activitads dal temp liber ed ellas surprendan incumbensas dal maun public.

audio
Bunura: 100'000 uniuns datti en Svizra, en Grischun 2'700
ord Actualitad dals 17.10.2019.
laschar ir. Durada: 4 minutas 16 Secundas.

Sport dominescha

Circa 30% da las uniuns sa fatschentan cun sport. Enturn 25% èn uniuns da hobby e da temp liber. Radund 20% han da far cun cultura e 10% èn uniuns caritativas e tar il rest sa tracti d'uniuns da politica, religiun e ecologia.

«Uniun da Giuseps» e «Dia Patschifiga»

Tenor la pagina d’internet vereinsverzeichnis.ch datti gia be en il Grischun radund 2’700 uniuns che sa fatschentan per exempel cun sport, musica, temas caritativs e cultura. Tranter tut quels datti tscherts exemplars extraordinaris.

audio
Bunura: Uniuns originalas
ord Actualitad dals 17.10.2019.
laschar ir. Durada: 3 minutas 31 Secundas.

L’uniun da Giuseps è in’uniun da Trun. Ella lubescha be a quellas persunas d’entrar l’uniun ch’han num Giusep ni sumegliant sco per exempel Giuseppa ni Giuseppina. En il mument dumbra l’uniun enturn 64 persunas. Il president Giusep Demont declera ch’ins rimnia cun l’uniun tranter auter daners per projects caritativs. Era a Cuera datti uniuns spezialas. Numnadamain l’uniun «Dia Patschifiga». Sco il pled gi gia, sa fatschentan quels cun chaussas cumadaivlas. Per exempel van els ensemen a tschanar cuminaivlamain sco il president Josef Wyssling declera.

RR actualitad 07:00

Artitgels legids il pli savens