Siglir tar il cuntegn

Chantun 113'000 pli paucas pernottaziuns en hotels grischuns

En il Grischun han er il 2016 damain turists pernottà. Il dumber da pernottaziuns è sa reducì ils emprims sis mais per 4,5% (113'000 pernottaziuns) sin total 2'407'919 pernottaziuns, quai communitgescha l’Uffizi per economia e turissem dal Grischun.

persuna stgargia cofras ord l'auto avant in hotel
Legenda: L'emprim mez onn han danovamain pli paucas persunas pernottà en ils hotels grischuns. Keystone

Ina giada dapli ha il Grischun uschia registrà il pli grond minus da pernottaziuns da tuttas 14 regiuns turisticas en Svizra. Il Vallais ha in minus da 70'000 / - 3.7% e la Part sura bernaisa in minus da 63'000 / -3.6%. En tut han set da las 14 regiuns turisticas nudà damain pernottaziuns l'emprim mez onn. L'entira Svizra ha dumbrà l'emprim mez onn 16,8 milliuns pernottaziuns, quai èn 1,2% / 199'000 damain ch'avant in onn. 9,1 milliuns pernottaziuns van sin il conto da giasts da l'exteriur, quai è ina reducziun da 2,5% u 234'000. Las pernottaziuns da giasts svizzers èn s'augmentadas per 0,5% sin 7,7 milliuns.

Damain pernottaziuns er il zercladur

La hotellaria grischuna ha registrà il mais zercladur 253'758 pernottaziuns, quai èn passa 20'000 u 8,4% pli pauc ch'il zercladur 2015. Il resultat sa laschia declerar per gronda part er pervi da l'aura bletscha durant il zercladur, scriva l'Uffizi federal da statistica. Il zercladur ha l'entira Svizra registrà 3,1 milliuns pernottaziuns, da quai èn 1,3 milliuns pernottaziuns da giasts indigens.

Legenda:
Pernottaziuns en Grischun: Cliccar sin ils onns per activar e deactivar las lingias per cumparegliar las pernottaziuns da differents onns. ORIGINAL Quai è il diagram cun tut las cifras - mo duvrar per retschertgas Cifras da l'Uffizi federal da statistica (2005-2018)

RR novitads 10:00