Siglir tar il cuntegn

Header

Navigaziun

Legenda: Guardar il video Bilantscha dal giubileum 100 onns Lia Rumantscha. Durada 02:57 minutas.
Or da Telesguard dals 19.08.2019.
cuntegn

100 onns Lia Rumantscha Reussì e bain visità

Reussì e bain visità – uschia valitescha la Lia Rumantscha en lur communicaziun da pressa il program da giubileum. Dal prim fin ils 18 d'avust ha la Lia Rumantscha festivà ses giubileum da 100 onns. Il Plazzet da Zuoz è daventà in lieu d'inscunter e da barat, ma er la bell'aura ha contribuì a quest success.

«Tredeschin Retg»

In dals puncts culminants dal festival è stà il teater «Tredeschin Retg». Il teater inscenà cun musica e saut ha giudì gronda popularitad. Radund 5'000 persunas han visità la manifestaziun. Il teater «Tredeschin Retg» è stà vendì ora cumplettamain ed i ha schizunt dà duas preschentaziuns supplementaras.

Legenda: Guardar il video Reacziuns – premiera «Tredeschin Retg». Durada 03:29 minutas.
Or da Actualitad video dals 03.08.2019.

Viv barat

Durant ils 11 dis tematics haja dà in viv barat tranter las Rumantschas ed ils Rumantschs da las differentas valladas, da la diaspora sco era tranter las cuminanzas linguisticas dal Grischun e da la Svizra. Uschia tira la Lia Rumantscha bilantscha ed ella constatescha:

  • Ch'il focus na saja betg stà sin il passà. Mintga di hai dà occurrenzas che han dà in'egliada en il futur. Las discussiuns sajan stadas constructivas ed orientadas a soluziuns.
  • Che la solidaritad naziunala cun la Rumantschia saja gronda. A la Lia èsi reussì da far attent tut las parts da la Svizra a las particularitads e las sfidas en connex. Igl è vegnì rapportà sur ils cunfins da las festivitads.
  • Che la Rumantschia vivia. Ils Rumantschs han grond plaschair da discutar, barattar opiniuns e da star en cumpagnia.

RR novitads 11:00

«Buna reclama per Zuoz»: Sonda saira ha era Andrea Gilli fatg bilantscha positiva.