Siglir tar il cuntegn
Inhalt

Chantun 1 onn Meinfernbus a Cuira

Meinfernbus tira ina bilantscha positiva suenter prest in onn a Cuira. Ils bus sajan occupads bain ed ils resuns dals passagiers fitg buns, uschia la pledadra da medias da Meinfernbus, Marie Gleustein. Cifras exactas n'ha la fatschenta tudestga dentant betg communitgà.

Bus da Meinfernbus.de
Legenda: Ils bus da Meinfernbus porschan viadis directs Cuera - Minca e Cuera – Milaun. Keystone

Nagins problems

Tenor Meinfernbus n'haja betg dà pli gronds problems sin ils viadis davent ed a Cuira durant l'emprim onn. Sulettamain ils uraris hajan ins stuì adattar in zic. Er il problem che passagiers nizzegian ils bus verds nunlubidamain, per exempel per arrivar pli bunmartgà da Cuira a Belinzona nua che Meinferbus fa pausa sin via a Milaun, na saja betg sa mussà. Quai ha er AutoDaPosta Grischun confermà ad RTR. AutoDaPosta Grischun metta a disposiziun il parcadi a la staziun da Cuira e venda er bigliets per Meinfernbus.

Nagina concurrenza per AutoDaPosta Grischun

Tenor il manader regiunal dad AutoDaPosta Grischun, Manfred Kürschner, portia Meinfernbus dapli passagiers per ils autos da posta davent da Cuira. Perquai beneventass el perfin sche Meinfernbus augmentass la purschida a Cuira e davent da Cuira. Tenor Kürschner pudessan ils bus verds pir daventar ina concurrenza per ils bus mellens sche Meinfernbus dastgass er porscher viadis entaifer la Svizra. Quai n'è actualmain betg lubì.