«Café Rumantsch cun la directura»

RTR organisescha ensemen cun la Lia Rumantscha (LR) il «Café Rumantsch cun la directura». Vus pudais star da cumpagnia e discussiunar cun la directura da RTR, Ladina Heimgartner, davart ils programs da RTR. Vossa vusch è dumandada ils 25-10-17 a Trun, a las 17.00 en la Ustria Café Tschut.

Emprender d’enconuscher tar petta e café l’interpresa da medias RTR e tschentar dumondas a la directura: Dapi november 2016 organisescha RTR ensemen cun la LR ils «Cafés Rumantschs cun la directura». Il 2017 han anc lieu trais Cafés en las regiuns.

02-03-2017: «Inscunter interrumantsch e café cun la directura» a Turitg

Passa 50 persunas interessadas han visità la gievgia, ils 02-03-17 l'inscunter interrumantsch ed il café cun la directura a la Giesserei a Turitg. La saira en la diaspora ha purtà interessants aspects ed intginas dumondas en connex cun l'iniziativa No-Billag. In auter tema eran las 15% persunas rumantschas che vivan a Turitg e fissan er interessadas a temas betg grischuns/regiunals.

Laschar ir video «Impressiuns dal café cun la directura a Turitg»

Impressiuns dal café cun la directura a Turitg

0:48 min, dals 3.3.2017

Tge schais Vus da RTR?

Ladina Heimgartner vul eruir dals giasts tge ch’els pensan da RTR, tge emissiuns che plaschan spezialmain e tgeninas pli pauc, tge che manca en l’offerta da RTR, tge che fa plaschair e tge main.

«Ils collegas da SRF han lantschà cun success il format da radio e televisiun ‘Hallo SRF’. Era nus tschertgain il barat cun il public – ma nus faschain quai sin nossa moda e maniera rumantscha: En las regiuns en empernaivla cumpagnia cun noss public. Quasi al tavulin, ma cun café enstagl da la biera», di Ladina Heimgartner.

Emprender d’enconuscher tar petta e café l’interpresa da medias RTR e tschentar dumondas a la directura: Quai è la finamira dals «Cafés Rumantschs cun la directura» che RTR organisescha ensemen cun la Lia Rumantscha. Tant il 2016 sco er il 2017 han lieu en las regiuns mintgamai duas da questas sentupadas.

«  Quasi al tavulin, ma cun il café enstagl da la biera. »

Ladina Heimgartner
Directura RTR

20-01-2017: Dal «Café Rumantsch cun la directura» a Lumbrein

Ozendi as enclegia bler meglier ils auters idioms che anc pli baud. Quai è in punct ch'è adina puspè vegnì menziunà en la Casa d’Angel a Lumbrein. Dasper il laud hai dentant era dà critica, per exempel pervi da las infurmaziuns sbagliadas en las communicaziuns da traffic.

Radund 20 persunas èn suandadas l'invit da la Lia Rumantscha ed RTR ed èn vegnidas per discutar cun la directura Ladina Heimgartner. Tut en tut è il resun stà positiv. Uschia è per exempel vegnida ludada la spierta da la pagina d’internet rtr.ch e l’applicaziun playRTR. Ultra da quai hai era dà bler laud per las moderaturas ed ils moderaturs dal Radio Rumantsch. Tge ch'è vegnì mess en dumonda dad in u l’auter preschent è stà sche RTR fetschia avunda per la glieud rumantscha ordaifer il Grischun. In’idea ch'è vegnida tractada è stada da puspè introducir in gieu interregiunal en la Televisiun Svizra Rumantscha.

Laschar ir video «Café Rumantsch cun la directura a Lumbrein»

Café Rumantsch cun la directura a Lumbrein

0:54 min, dals 20.1.2017


07-12-2016: Dal «Café Rumantsch cun la directura» a Savognin

La musica al Radio Rumantsch, l'iniziativa «No Billag» ed er l'emissiun Minisguard eran temas centrals al Café Rumantsch cun la directura RTR, Ladina Heimgartner a Savognin. Radund 30 persunas han discutà avertamain e cun bler anim la purschida da RTR.

Per insaquants hai memia blera musica da l'America dal Sid e per auters è la musica uschè buna ch'i dat bunischems bisquits. Puspè auters apprezieschan tar votaziuns ch'i survegnan sin rtr.ch uschè svelt las infurmaziuns or da las regiuns. Tut en tut hai dà bler laud per la purschida dad RTR.


23-11-2016: Dal «Café Rumantsch cun la directura» a Scuol

Radund 50 persunas èn s'inscuntradas en la Pizzaria Taverna a Scuol per discutar cun la directura RTR, Ladina Heimgartner. Discutar davart Radiotelevisiun Svizra Rumantscha, sia purschida e lur giavischs.

Per ils ins dat quai memia blers germanissems en il Radio Rumantsch, per auters ha la Televisiun Rumantscha memia pauc temp d'emissiun. Sut il stritg èn las preschentas ed ils preschents sa mussads fitg cuntents ch'i dat RTR.

RR actualitad bunura 06:00

Nua poss jau dir insatge?

2 commentaris

Serrar
    • , flem casa d`uaul

      Venderdi, 25.11.2016, 06:34

      bien di dunna ladina heimgartner cu jeu hai viu quell`occurenza ha quei plaschiu a mi. jeu teidlel e mirel savens rtr.ch il contact persunal ei in fenomen fetg impurtont. stei bein e tut bien giavischel a vus ed a vossas conluvreras ed a vos conluvrers. salids amicabels giusep bundi flem

      • , Cuira

        Dumengia, 27.11.2016, 15:38

        Prezià signur Bundi Grazia fitg per Voss resun che fa grond plaschair - a mai sco era a tut la squadra RTR. L'esser datier dal public è ina chaussa che caracterisescha nossa Svizra rumantscha - jau sun absolut d'accord cun Vus. Perquai è il barat persunal era da grond'impurtanza per nus tar RTR. Ils 20-01-2017 essan nus cun il Café Rumantsch en la Surselva (il lieu exact è anc avert). Forsa avais era Vus gust e temp da far ina visita. Jau ma legrass en mintga cas.