Buis da laina u schluppet sintetic?

Pli baud era la «Martini» LA buis da chatscha en il Grischun. Ozendi è quai sa midà ferm. Las buis èn bler pli segiras, la tecnica pli moderna. Adina dapli chatschadras e chatschaders possedan in schluppet ord material sintetic e betg pli da lain.

Buis da laina.

Legenda da maletgs: Buis da laina. Keystone

La Martini na correspundia betg pli a las pretensiuns da segirtad d'ozendi, di Michael Koller, constructur da schluppets da San Murezzan. Pertutgant la segirtad da buis èn las spetgas creschidas. Giavischà èn oravant tut buis sin in aut stan tecnic.

Ina spezialitad en il Grischun è il caliber 10,3 per la chatscha. Quel n'è betg fitg derasà en auters chantuns u en il rest da la Svizra. Cunquai che la muniziun per quest caliber è chara, vulan blers chatschaders era in schluppet cun ina channa variabla. Uschia pon els midar ora la channa senza stuair avair duas buis.

20'000 fr. e dapli per gravuras

Quai che na vegn strusch giavischà èn gravuras sin la buis da chatscha. El haja magari clients che giavischan ina buis exclusiva, ina buis che sa differenziescha d'autras buis. En tals cas veglia il client era ina gravura sin ses schluppet. Per in bel schluppet cun ina gravura exclusiva saja da quintar cun custs da 20'000 fin 30'000 francs ed era dapli. Quests schluppets sajan sco in simbol da status, di Michael Koller.