Siglir tar il cuntegn
Inhalt

Grischun Blera plievgia cun temperaturas tranter 9 e 14 grads

En il decurs dal suentermezdi e cunzunt la notg èsi da quintar cun blera plievgia e per part era urizis.

glieud cun paraplievgias sin via
Legenda: Plievgia, plievgia ed anc ina giada plievgia – uschia las prognosas dals meteorologs per ils proxims dis. Keystone

La pli blera plievgia spetgan ils meteorologs en la Surselva. SRF Meteo ha dà ora avertiments per la Cadi, Lumnezia e Val. En quellas regiuns èsi da quintar cun plievgia permanenta. Ma er en il Tujetsch, sur la Val Rain fin en il Mesauc datti blera plievgia. Il pli ditg sitg, statti probablamain en l'Engiadina ed en la Val Müstair. Mesemna poi malgrà blers nivels er adina puspè dar in zic sulegl. Encunter saira surpiglia però la plievgia.

Temperaturas crodan

La notg crodan las temperaturas per gronda part sin 14 grads, en l'Engiadina sin 9 grads. Mesemna tanschi lura anc per maximalmain 18 fin 22 grads.

Cuvert e plievgia fin sonda

Gievgia èsi per gronda part cuvert ed i plova era adina puspè. Il cunfin da naiv sa sbassa sin 2'000 meters. Era venderdi vai vinavant cun bler plievgia, sulet en las valladas dal sid sa mussa il sulegl tranteren.

Sonda datti durant il di puspè bler sulegl, quai era en il nord dal chantun. Fin dumengia èsi lura dapertut bi, i dat bler sulegl ed er las temperaturas van puspè ensi.