Siglir tar il cuntegn

Header

cuntegn

Grischun Blau e mellen èn las colurs preferidas

Il club da hockey da Tavau ha il mument pausa da gieu, quai enfin ils 21 da mars. Durant ch’ils giugaders pon tancar novas forzas, sa preparan era ils fans sin ils mezfinals dals Playoffs.

In giugader preferì n’ha Livio Pally betg. El è sezs goali en in’equipa da hockey d’amaturs da Trun. Ses emprim autogram ha il giuven da Tavanasa survegnì probabel da Reto von Arx, ma lura è el anc stà in mattatsch.

Dapi ch’el è fan activ haja el pudì festivar sis titels da campiun svizzer cun il club da hockey da Tavau. Insaquants onns fascheva el part al club da fans uffizial. Lura haja el designà sezs bandieras ed el gieva per tut la Svizra enturn a guardar ils gieus. Durant questa stagiun haja el vis sulet 14 gieus, dus da quests durant il ¼ final dals Playoffs.

audio
Bunura: Livio Pally - Blau e mellen èn las colurs preferidas
ord Actualitad dals 16.03.2017.
laschar ir. Durada: 3 minutas 12 Secundas.
Il HCD è mia vita
Autur: Livio Pally Tavanasa

Blau-mellen era en chombra a chasa

Livio Pally, il giuven scrinari da 25 onns, n’è betg mo en halla da glatsch in fervent fan dal club da hockey da Tavau. Era en sia chombra ha el rimnà blers souvenirs da ses club preferì. Sia amia saja stada fan dal HC Lugano, ma ussa sustegn era ella il club da hockey da Tavau.

10 dis senza in gieu dal HCD

Enfin ch’ils mezfinals dals Playoffs cumenzan, persequitescha Livio ils gieus da las ulteriuras squadras. Uschè svelt ch’il proxim adversari da Tavau è enconuschent, organisescha el ils bigliets per ils gieus d’ordaifer. El giavischa che Tavau frunta en ils mezfinals sin Zug ed el final lura sin l'SC Berna. E sa chapescha è il fan blau-mellen persvadì che la squadra dad Arno del Curto festivescha questa stagiun ses 32avel titel da campiun svizzer.

RR actualitad 08:00

Artitgels legids il pli savens