Il november n'era quest onn betg fitg fraid ed er betg fitg bletsch en Grischun. Er la naiv n'è anc betg propi vegnida. Jürg Ackermann da SRF meteo di ch'i na saja betg stà in november normal. Las temperaturas sajan stadas plitost autas e plievgia u naiv haja era dà pli pauc che normalmain.
A Cuira è la temperatura stada mo ina giada sut nulla grads. Normalmain capita quai otg giadas il november a Cuira. Naiv hai dà be sur 1'200 meters, surtut enturn il massiv Bernina ed en parts da la Surselva.
La naiv duai dentant vegnir il december. L'emprima mesadad dal mais duaja adina puspè naiver in zic. Tenor Jürg Ackermann na saja dentant betg da quintar cun grondas quantitads da naiv.
