Fugir da la chalira en la Bassa ed ir en la muntogna – quai è ina raschun per la buna stagiun da l'hotellaria. Ils hotels sa revegnian pli ferm e pli svelt da las sfidas da corona che sperà, ha ditg Andreas Züllig, il president da Hotelleriesuisse envers RTR. Ed il ferm franc svizzer na fa nagin mal il venter – damai che la concurrenza en l'exteriur patescha d'ina auta inflaziun.
Promover persunal per far frunt a mancanza
La mancanza da persunal è stà in dals problems che ha accumpagnà la branscha durant la stad. Per part saja la capacitad vegnida reducida, cun per exempel servir mo la mesadad da las maisas u betg occupar tut las chombras en in hotel.
Students e studentas sco agid supplementar han gidà nus da surmuntar la stad.
I dettia dentant anc adina dapli plazzas vacantas che persunas senza lavur en la branscha. Per schliar las stretgas da persunal manegia Andreas Züllig che la branscha sezza stoppia daventar activa cun scolar nova glieud. Persunas che vegnan d'in auter sectur professiunal sco era la nova generaziun da persunal stoppian vegnir promovidas. I saja era da ponderar novs models da lavur.
Elavurar strategias per l'enviern
In'autra sfida che fa quitads ad Andreas Züllig en vista a l'enviern è la mancanza d'energia. Uschia pudessan mesiras cunter in'eventuala mancanza avair consequenzas negativas per la branscha d'hotels. Quai per exempel sch'indrizs da wellness u las pendicularas vegnissan serradas. Sulet cun purschidas da viandar e da passlung na possian ins betg carmalar avunda giasts durant la stagiun d'enviern. Las pendicularas sajan per part responsablas per 90% da la svieuta durant la stagiun d'enviern. Perquai saja gia uss da ponderar co pudair spargnar energia en l'agen manaschi.
Dapli giasts en Grischun ed en Svizra
Var 30% munta il plus en il Grischun, quai èn passa 2,8 milliuns pernottaziuns. Il pli grond plus han las destinaziuns grondas fatg, sco l'Uffizi per economia e turissem dal Grischun scriva. Var 40% dapli pernottaziuns han nudà Engiadina/San Murezzan, Tavau/Claustra ed Arosa. Er il sguard sin las cifras dal mais zercladur mussa in fitg bun resultat: Cun passa 370'000 pernottaziuns hai dà en il Grischun var 20% dapli pernottaziuns en congual cun il zercladur 2021.
En l'entira Svizra èn las cifras s'augmentadas per 47%, cumpareglià cun l'onn 2021. Per part cuntanschan ils hotels bunamain las cifras da l'onn 2019, l'onn avant la pandemia. Quel era stà cun 40 milliuns pernottaziuns en Svizra in onn da record.
I dat però differenzas da regiun tar regiun: Cunzunt regiuns sco per exempel l'Engiadina han gì in grond augment da pernottaziuns, cunquai ch'ella sa focusseschan sin il martgà internaziunal ch'era uss puspè avert. Regiuns ch'attiran plitost osps svizzers han per part gì pli paucs osps, cunquai ch'i dat en general puspè pli paucs osps svizzers. Quai pertutga per exempel Lai.
Ernst Wyrsch è surprais
Ils resultats sajan surprendents – atgnamain avevan ins quintà cun pli paucas pernottaziuns. Quai ha ditg Ernst Wyrsch, president da HotellerieSuisse Grischun envers il schurnal regiunal dad SRF.
Ina decleraziun pussibla saja, ch'i ha dà dapli giasts ch'èn vegnids a curta vista. In'autra decleraziun saja la bun'aura: Cun relativamain pauca naiv e temperaturas agreablas ha la stagiun da viandar e dad ir cun bike pudì cumenzar pli baud. Las autas cifras da pernottaziun dals ultims mais sajan in bun indicatur, ch'er ils ulteriurs mais da stad vegnian buns. I giaja perfin en direcziun d'ina stad da record, uschia Ernst Wyrsch. Tge ch'ins stoppia dentant er vesair è che la branscha patescha d'ina mancanza da persunal.
Svizra Turissem er cuntenta cun la stad
Svizra Turissem tira ina bilantscha provisorica positiva per la stad. In studi da l’associaziun da branscha mussa che l’interess per far vacanzas en Svizra è anc adina grond. Tenor il studi han bain damain giasts svizzers fatg vacanzas en lur pajais cumpareglià cun la stad da record dal 2021. La gronda part dad els fetschia anc adina vacanzas en regiuns da muntogna, di il directur da Svizra Turissem Martin Nydegger.
Percunter èn puspè dapli giasts esters vegnids en Svizra. Concret quinta Svizra Turissem cun 3% dapli pernottaziuns per la perioda tranter il zercladur e l’avust. Tar il dumber da visitadras e visitaders quinta l’associaziun schizunt cun in plus da 12%.
