Siglir tar il cuntegn

Header

video
Animals da rapina gronds fan quitads a l'Uniun purila grischuna
Or da Telesguard dals 15.06.2022.
laschar ir. Durada: 2 minutas 49 Secundas.
cuntegn

Agricultura Purs pretendan agid cunter il luf

Gia avant che la stagiun d'alp ha propi cumenzà haja il luf gia stgarpà 39 animals (stan fin matg). Quai saja ina situaziun «nunpussaivla» per puras e purs, uschia ha ditg l'Uniun purila grischuna.

La stagiun d'alp stat avant porta e las puras ed ils purs sa sentian laschads persuls cun il problem dal luf. Perquai è l'Uniun purila grischuna sa messa ensemen cun l'uniun per la tratga da nursas, da chauras e l'uniun per purs da vatgas mamma ad ina conferenza da pressa. La finamira: Presentar a las medias lur pretensiuns envers Berna.

audio
Uniun purila e lufs: situaziun nun supportabla per l'agricultura
ord Actualitad dals 15.06.2022.
laschar ir. Durada: 5 minutas 2 Secundas.
Nus avain scrit ina brev a la cussegliera federala Simonetta Sommaruga sco er al cusseglier guvernativ Mario Cavigelli. Quella declera nossa situaziun che basegna agid.
Autur: Thomas Roffler president Uniun purila grischuna
Il president da l'uniun purila Thomas Roffler pretenda agid da Berna.
Legenda: Thomas Roffler, il president da l'uniun purila Thomas Roffler pretenda agid da Berna. RTR

L'intent da la brev saja da mussar, che la situaziun saja alarmanta per bleras persunas en las regiuns e ch'ins pretenda che la Confederaziun surpiglia responsabladad e na laschia betg persuls ils purs cun lur problems.

Anc ina stad pazienza?

Cunquai ch'ils mulins da la Confederaziun molian plaun, drizzan ils purs lur clom d'agid er envers il chantun. Quel possia entras la nova lescha da chatscha dentant gidar be en pitschnas purziuns, di il minister da construcziun, traffic e selvicultura Mario Cavigelli.

Nus pudain porscher maun per exempel cun indemnisar ils custs dal veterinari per ina nursa blessada ubain cun indemnisar il viadi sin l'alp.
Autur: Mario Cavigelli minister da construcziun, traffic e selvicultura

Ina gronda midada da la lescha da chatscha che lubiss per exempel puspè al chantun da regular il luf en atgna reschia na dettia quai per la proxima stad betg, dentant la finamira dal chantun fiss schon da pudair adattar la lescha. «Jau spetgel che la gronda midada vegn ad esser la pussaivladad, da far ina regulaziun antizipativa. Pia gia ordavant planisar quants lufs che nus vulain en noss territori e suenter suandar quest plan. Sumegliant sco tar il capricorn.»

RTR actualitad 17:00

Artitgels legids il pli savens

Scrollar a sanestra Scrollar a dretga