L’avust dal 2017 hai dà ina crudada da crappa al Piz Cengalo cun otg morts en la Val Bondasca e cun bovas ch’èn arrivadas fin en la vischnanca da Bondo ed han destruì parts da quella. Oz regorda in grond plazzal da construcziun, direct sper la via naziunala, anc adina da la catastrofa. Per 42 milliuns francs vegn construì in batschigl cun mirs da crappa da segirezza, punts che la bova aveva devastà vegnan refatgas e la via naziunala vegn auzada. Uschia vegn fatg plaz per in milliun meters cubics material che pudess vegnir giu. Il Piz Cengalo è numnadamain anc adina en moviment.
Normalitad è turnada
Malgrà il plazzal ed il travasch da construcziun para la vita da las abitantas e dals abitants da Bondo d’esser turnada a la normalitad. Be sch’i plova ferm vegnan sentiments curius e las regurdientschas dals 23 d’avust 2017 turnan.
Cura ch’i plova han tuts en sasez quellas ramurs fermas da lezza giada. Però: Ins sto guardar vinavant!
Anna Giacometti è sa distanziada
Er la vita dad Anna Giacometti è sa midada cumplettamain dapi la bova dal Cengalo. Ella sa regorda anc vi da mintga minuta dal di da la tragedia. L’anteriura presidenta communala da la vischnanca da Bregaglia è vegnida enconuschenta d’in mument a l’auter en l’entira Svizra. Quai saja stà in temp difficil cun in grond squitsch, di Anna Giacometti. Oz na pensa ella però betg pli savens vi da la catastrofa. L’onn 2019 è ella numnadamain vegnida elegida sco cussegliera naziunala ed è sa retratga sco presidenta communala. Ella sa focussescha sin la lavur a Berna.
Oz na pens jau betg pli bler vid la catastrofa. Ils blers referats e discurs han gidà d’elavurar quest temp difficil.
Er suenter tschintg onns è il cas giuridic anc pendent. Numnadamain è la procura publica vid examinar, sch'ins avess pudì evitar unfrendas. Anna Giacometti ha encletga ch’ils confamigliars vulan savair sch’igl è capità in sbagl. Tuttina na duajan ins betg emblidar che la bova saja stada ina catastrofa da la natira.
Era la crudada previsibla u betg?
Confamigliars da las victimas pretendan in expert independent che sclerescha danovamain il cas, uschia er Dorothea Karalus che viva en Germania. Ella ha pers ses bab Helmut Karalus, in alpinist versà, tar la crudada da crappa al Piz Cengalo. Quai ha rapportà il Beobachter ed envers SRF ha in confamigliar piglià per l’emprima giada posiziun.
Sco che retschertgas da SRF demussan, saja la proposta da la procura publica per in expert independent fitg dispitaivla. L'expert svizzer proponì saja president dal cussegl administrativ e partenari dad ina firma che collavura da temp en temp cun l'Uffizi da guaud e privels da la natira dal chantun Grischun. Questa firma n’haja betg gì incumbensas al Piz Cengalo. Ma ella era durant la bova en la Val Bondasca sa participada substanzialmain vi dad ina interpresa ch’era dapi il 2013 activa en il management da privel enturn il Piz Cengalo.
Il cas è pendent, sche l'expert independent proponì da l'uffizi dastga far quella lavur u betg sto uss decider la Dretgira chantunala.
Val Bondasca sut controlla
Dapi tschintg onns vegnan la Val Bondasca ed il Piz Cengalo survegliads permanentamain perquai che la muntogna è anc adina en moviment. Sper la controlla permanenta datti er controllas annualas. Ina giada l'onn evalueschan ils responsabels da chantun, vischnanca e geologs il svilup da la val ed il Cengalo sin il lieu. Els fan fotografias per avair in congual ed observan er ad egl eventualas midadas e privels.
Actualmain n’existia nagin privel acut d’ina crudada da crappa cun ina gronda massa, uschia Martin Keiser da l’Uffizi da guaud e privels da natira dal chantun Grischun. Cun bovas enfin a Bondo stoppian ins dentant adina far quint, er senza ulteriuras grondas crudadas da crappa giu dal Cengalo. En la Val Bondasca bastassan numnadamain era ferms temporals per puspè metter en moviment l'enorma quantitad da material ch'è s'accumulada dapi il 2017.
