Dapi quest termin èsi pussaivel da survegnir in certificat da corona cun in test negativ fatg en in manaschi – ils tests èn gratuits. En tut sa participeschan radund 2'700 firmas. En total vegnan uss var 34'000 emploiadas ed emploiads testads regularmain sin il coronavirus. Quellas persunas pon uss dumandar per in certificat via ina plattafurma. Tar in test negativ survegnan ellas quest certificat via sms u mail.
Ch'il chantun porscha quests certificats gratuit, durant che la Confederaziun ha abolì ils tests gratuits dapi l'entschatta october, n'è betg dal tut voluntari. Tenor Bühler manchia al chantun la basa legala per far pajar per ils tests.
Privel per la voluntad da vaccinar?
La purschida saja in act da ballantscha. Plinavant haja il chantun fatg bleras ponderaziuns avant ch'el haja decis quest pass, uschia Bühler. La tema, ch'ils certificats gratuits sbassian la motivaziun da sa laschar vaccinar, n'è fin uss betg sa verifitgada.
Nus n'avain nagina reducziun tar las vaccinaziuns
Cler è ch'i dat ils test sulettamain fin la fin d'october. Alura ha il chantun u la basa legala per far pajar per ils tests, ni che quels vegnan stritgads.
