La polizia – Tes ami e gidanter

La polizia vegn appreziada da differenta moda e maniera en l'Europa. En Svizra èsi dapli che dus terzs ch'han confidenza en la polizia.

Dus policists da la polizia chantunala grischuna che mussan il dies en la foto.

Legenda da maletgs: La polizia vegn appreziada da differenta moda e maniera en l'Europa. Keystone

La polizia en Svizra ha il duair da proteger nus e da procurar per segirezza. Per che la polizia possia far quai suffizientamain dovra ella la confidenza dal pievel che sustegna ella. Quai para da funcziunar detg bain. Passa la mesadad dals Svizzers fidan a la polizia, e bunamain 20% dals Svizzers fidan absolutamain a la polizia. Be circa in quart dals Svizzers na fida plitost betg u insumma betg a la polizia.

Sumeglianta è la situaziun en l'Austria ed en la Germania. Plinavant mussan era la Slovenia, la Finlanda, l'Estonia, il Danemarc ed il Pajais bass blera confidenza en la polizia. La pli blera confidenza en la polizia han ils Pajais bass cun passa 60% dals participants che han plitost blera e 17% che han fidanza absoluta en la polizia.

Corrupziun e crisas da finanzas

Pajais che han ina lung'istorgia problematica da politica u che han da curt gì da surmuntar crisas economicas u era politicas, n'han nagina u pauca confidenza en la polizia. Quai èn pajais sco per exempel la Grezia e l'Italia. L'Italia cun sia istorgia dal faschissem e da las numerusas istorgias en connex cun corrupziun tras la Mafia. Era la Grezia che ha gì da surmuntar ils ultims onns ina greva crisa da finanzas. En quels dus pajais din passa 50% (Italia) ni perfin passa 60% (Grezia) dals participants ch'i na fidian betg, plitost betg u insumma betg a la polizia.

Era en la Tirchia e la Russia n'ha la polizia per bler betg la confidenza da la populaziun. Passa la mesadad di ch'els na fidian insumma betg a la polizia. Il dumber da participants è dentant uschè pitschen (sut 100 participants) ch'ins na po betg prender conclusiuns londeror, damai ch'il dumber è betg represchentativ.

Terrorissem

Betg mo en pajais da crisas economicas u politicas èn ins in pau sceptic envers la polizia. Era pajais che han gì da suffrir attatgas terroristicas na fidan betg uschè ferm a la polizia. Quai probablamain perquai ch'ella n'è betg stada abla da proteger la populaziun da talas attatgas. Uschia en la Frantscha, la Spagna ed en il Reginavel Unì.

Sche Vus avais gust d'era prender part a quest questiunari, lura cliccai quai.

Adatg: Las cifras en quest questiunari sa midan cuntinuadamain! Per vesair las cifras actualas, dai in sguard qua sut.