Siglir tar il cuntegn
Inhalt

Generation What Guerra? Senza mai!

Enfin uss han stgars 4'200 giuvenils Svizzers tranter 16 e 35 onns respundì a questa dumonda. 58% dad els han ditg «Na». Els na fissan betg pronts da cumbatter per lur pajais.

Ina charta dal mund en il stil "Vintage" cun davanttiers numerus mauns en diversas colurs e l'inscripziun "no war"
Legenda: Blers giuvenils na fissan betg pronts da cumbatter per lur pajais Colourbox

Sumegliant vesi or tar noss vischins en l'Austria. Er els na fissan betg pronts da cumbatter per lur pajais. En l'Austria han gia passa 40'000 giuvenils fatg part al questiunari. Passa 60% han respundì cun «Na» la dumonda schebain els fissan pronts da cumbatter per lur pajais en cas da guerra.

Mo paucs patriots en Europa?

Er ils giuvenils en auters pajais sco per exempel la Belgia, l'Irlanda e l'Italia na vulessan betg cumbatter per lur pajais. En Germania din schizunt 69% «Na» al servetsch activ en cas da guerra. Là han gia da quai da 56'000 giuvenils fatg part a l'enquista. E, malgrà ils acts da terrur en Frantscha, na schessan mianc ils Franzos «Oui» ad in cumbat per lur pajais. Las datas ord la Frantscha èn però pli veglias. Il project Generation What è oriundamain franzos.

Paucs participants en ils pajais da l'ost

Enfin uss n'han betg bleras persunas fatg part a la retschertga en pajais sco la Bulgaria, la Croazia, l'Albania, l'Ungaria, la Pologna ubain la Rumenia. Sulettamain da la Republica Tscheca datti cifras pli concretas: 57% da 34'200 che han dà resposta cumbattessan per lur pajais. La Russia cun ses passa 143 milliuns abitants n'è betg fitg activa quai che pertutga respunder las dumondas da la retschertga. Mo 54 giuvenils russ han fatg part enfin uss. Da quels din in zichel dapli che la mesadad «Na» ad in cumbat per lur pajais.

Il questiunari da Generation What è avert fin l'avrigl 2017. Cumbattesses ti per tes pajais? Ta participescha al questiunari «Generation What», il link avra en ina nova fanestra.

Las datas numnadas en quest artitgel sa midan cuntinuadamain.