Siglir tar il cuntegn
Inhalt

Festa naziunala «Grotto in vaso» dad Ivo Adam

spisa en il magiel
Legenda: Il grotto en magiel dad Ivo Adam. RSI

Ingredienzas (per 4 persunas)

Savurs dal grotto:

  • 200 g paun da la Vallemaggia, dir
  • 40 g paintg
  • 150 g chaschiel d’alp stagiunà
  • 100 g mortadella da gnirom
  • 1 pistun da tirc cotg
  • 100 g salam stagiunà
  • 100 g divers legums en aschieu
  • paiver da la Vallemaggia

Stgima da polenta:

  • 500 g farina da tirc
  • 2 l aua
  • sal
  • 5 dl latg
  • 1 dl groma
  • 1 romin rosmarin

Preparaziun

Legende: Video Ivo Adam e Clarissa Tami fan «grotto en magiel» abspielen. Laufzeit 14:40 Minuten.
Or da RTR dals 17.07.2015.

Per preparar las savurs dal grotto: tagliar 200 g paun dir da la Vallemaggia en pitschens quaderins. Far luar 50 g paintg en ina padella antiadesiva, fin ch’el survegn ina colur da nitschola, lura metter tiers ils quaderins da paun e braslentar quels, fin ch’els èn bels brins e cresps. Tagliar lura er en quaderins fins 150 g chaschiel d’alp stagiun, 100 g mortadella da gnirom, ils grauns d’in pistun da tirc, 100 g salam stagiunà senza paletscha e 100 g divers legums en aschieu.

Per far la stgima da polenta: far coier en ina chazzetta 2 l aua salada e springir 500 g farina da tirc en l’aua, sbatter tut adina puspè cun in scuet. Coier la polenta per 1 ura e truschar quella da temp en temp. Lura metter la polenta en in plat, cuvrir quella cun ina folia transparenta e la laschar vegnir fraida, fin ch’ella è bain cumpacta. La polenta po vegnir preparada er in pèr dis avant. Metter la polenta sfradentada cun 5 dl. latg e 5 dl groma en ina chazzetta, agiuntar 1 romin rosmarin smatgà levamain per laschar sviluppar ses gust. Stgaudar la chazzetta e maschadar tut cun in scuet, fin ch’i dat ina bella crema fina ed omogena. Cundir cun sal, lura far passar la polenta tras in culin fin per survegnir ina crema senza gnocs. Svidar la crema da polenta en in sbattagroma a gas (kisag), serrar e chargiar quel cun 2 patronas «Cream». Scurlattar fitg bain, fin che la crema daventa stgima. Alura cumenzar d’emplenir il magiel u cup da vaider.

Sche Vus n’avais betg in sbattagroma a gas, pudais er sbatter la crema da polenta cun in mixer a batgetta per far la stgima.

Adam porscha in tschadun a Tami per degustar.
Legenda: Suenter la lavur vegn degustà. RSI

Per emplenir il magiel/cup da vaider cun las savurs dal grotto: squittarr ina stresa stgima da polenta sin il fund dal magiel/cup da vaider, agiunscher in pèr quaderins paun da la Vallemaggia braslentads en paintg, in pèr quaderins da legums en aschieu ed il davos in pau tirc per far tut in zichel dultsch. Squittar puspè ina stresa fina da stgima da polenta ed agiunscher insaquants quaderins charn (salam, mortadella da gnirom) cun inqual quaderins chaschiel d’alp. Cuvrir lura tut cun ina proxima stresa da polenta ed agiunscher il rest da las ingredienzas. Cuvrir cun ina davosa stresa da stgima da polenta e decorar cun inqual quaderin da las diversas ingredienzas ed insaquants grauns da paiver da la Vallemaggia.