Siglir tar il cuntegn
cuntegn

Festa naziunala Festa naziunala quadrilingua

Maria Victoria Haas, Clarissa Tami, Jean-Marc Richard e Sven Epiney van en crusch ed en travers tras la Svizra. A la tschertga da stgazis singulars vai sur culms e vals, sin l’aua e tras l’aria. Sin la «Älggi-Alp», il center geografic da la Svizra, s’entaupan els per festivar ensemen il 1. d’avust.

moderaturas en culissa da muntogna
Legenda: La moderaziun (da san): Jean-Marc Richard (RTS), Maria Victoria Haas (RTR), Clarissa Tami (RSI) e Sven Epinay (SRF). RTR

Maria Victoria Haas (RTR), Clarissa Tami (RSI), Jean-Marc Richard (RTS) e Sven Epiney (SRF) prendan cun els ils aspectaturs sin in viadi interessant tras la Svizra e mussan chaussas remartgablas da lur regiun. Per cuntanscher lur destinaziun finala - la «Älggi-Alp» - dovran els er meds da transport nunconvenziunals sco parasgulader, asen, wakeboard e canyoning.

«Per culms e vals»

Il viadi da Maria Victoria Haas entschaiva en il cor dal Grischun, sin la planira auta singulara da l’Alp Flix. Là entaupa ella in scutinader da chavals, sfunsa suenter en la chavorgia da la Viamala cun sia istorgia da transit da 2000 onns e visita a Surrein la chasa «ballantschanta» ch’il fundatur da zai ski Simon Jacomet è vi da bajegiar e ch’el preschenta per l’emprima giada a la publicitad. Lura sa metta ella sin viadi tras l’aria en direcziun Älggi-Alp.

moderaturas e moderaturs sut il simbol dal center geografic da la svizra
Legenda: Tant saja tradì: I han cuntanschì il final sin la Älggi-Alp, ed han bler da raquintar... RTR

«Per monti e valli»

Dal Monte Generoso tar l’Älggi-Alp: quest viadi fa Clarissa Tami. Per cuntanscher il center da la Svizra traversa ella las Alps tessinaisas. Ses viadi maina ella a trais plazzals che vegnan a midar la regiun – architectonicamain, culturalmain e geopoliticamain. Ensemen cun il star-cuschinunz Ivo Adam presenta ella particularitads da la cuschina tessinaisa e conserva quels daletgs en vaiders da sterilisar. Ed ella fa ina pitschna excursiun en il temp medieval, nua ch’ella passenta in’urella a la curt da l’imperatur Friedrich I., meglier enconuschent sco Barbarossa.

«Par monts et par vaux»

Jean-Marc Richard traversa ils trais chantuns da la Svizra romanda che festiveschan quest onn lur commembranza da 200 onns a la Confederaziun: Genevra, Neuchâtel ed il Vallais. Ses viadi entschaiva en il quartier genevrin des Bains, nua ch’il museum per l’art contemporan sa chatta. Cun in bastiment arriva el a Losanna ed entaupa en la catedrala il musicist Jean Duperrex. El visita l’abazia da Saint-Maurice, che festivescha quest onn ses giubileum da 1500 onns e fa cun il trottinet in gir en la Val-de-Travers, là nua che la «diala verda», l’absint, vegn brischà.

«Lueget vo Berg und Tal»

E Sven Epiney mussa che la «Älggi-Alp» po er vegnir cuntanschida sur l’aua. Dal Lai Rivaun va el l’entir tschancun sin lais e per lung da flums e dutgs. Cun questa chaschun emprenda el co ins metta tartuffels sin balcun, co ins piglia peschs e con curaschi ch’ins dovra per il canyoning. Ed el intervegn ch’il Marsmobil funcziunescha cun motors electrics svizzers.

Festivai e scuvri cun nus la Svizra multifara e quadrilingua.

Sonda, 1. d’avust 2015

  • a las 20:20 sin RTS1
  • a las 20:30 sin SRF1
  • a las 20:45 sin RSI LA 1