Siglir tar il cuntegn
Inhalt

Festa naziunala «Bizochels cun spinat» dad Ursula e Christian Weber

bizochels sin taglier
Legenda: Ils bizochels «naziunals» da Trun. RTR

Ingredienzas

  • 500 g farina (duvrar furment, spelta ubain la mesadad furmental)
  • 5 ovs
  • 2 enfin 3 dl aua da latg
  • 1 tschadun da té sal
  • 500 g spinat

Preparaziun

Derscher la farina en ina cuppa. Far ina rusna en la farina ed agiunscher ils ovs ed il sal. L’emprim metter tiers la mesadad da l’aua da latg, truschar tut cun ina palutta fin ch’i dat ina pasta glischa. Sbatter la pasta fin ch’ella croda en daguts gross dal tschadun e fa vaschias. Agiunscher tenor basegn la segunda mesadad da l’aua da latg.

Ins po duvrar differentas plantas da spinat, sco per exempel urtais, spinat, farinent d’Andri, urtaiset, darsvenna cumina, urticlas, pe-chaura ubain era giabus alv ubain versa. Lavar il spinat ed al tagliar gross.

Metter ina purziun pasta sin ina pitschna aissa da tagliar umida. Tagliar giu pitschens tocs cun in cuntè che sto tranteren adina puspè vegnir fatg bletsch e metter els en aua da sal chauda (buglion è meglier). Agiunscher tar mintga purziun pasta in maun plain spinat. Uschespert che las pastas lunghentas sa nodan sin la surfatscha ed il spinat è levamain cotg, prender tut cun in chaz ord l’aua da sal e metter en il furn en ina furma da gratinà prestgaudada. Lura coier la proxima purziun da pasta cun il spinat en l’aua e puspè metter en la furma da gratinar.

A la fin agiunscher tar ils bizochels cun spinat (tut) tenor giavisch in pèr tschaduns aua da sal, chaschiel grattà u/e tschagulas brassadas en paintg. Sterner suravi la tratga in pugn plain tschagugliuns, peterschigl e muclina sco era flurs mangiablas, sco carschun chaputschin, calendulas, feglia da rosas etc.

La tratga è era ideala per duvrar ils rests dal di avant. Uschia pon ins far ina nova spaisa deliziusa cun vanzadiras (legums u charn).