Siglir tar il cuntegn

Header

video
In dals pli impurtants WEFs dals davos onns
Or da Telesguard dals 26.05.2022.
laschar ir. Durada: 3 minutas 18 Secundas.
cuntegn

Fazit In dals pli impurtants WEFs dals davos onns

Il Forum mundial d'economia WEF da quest onn saja stà in dals pli impurtants dals davos onns. Quai il facit da la correspundenta dad RTR al WEF, Fabia Caduff. I saja stà in WEF en in rom pli pitschen, dentant cun clers temas.

Il tema central saja stà la guerra en l'Ucraina. Tranter auter è il minister da l'exteriur da l'Ucraina stà a Tavau, nua ch'el è s'inscuntrà cun il cusseglier federal, e minister da l'exteriur da la Svizra, Ignazio Cassis. Els han decis ensemen davart la conferenza da l'Ucraina che ha lieu il fanadur a Lugano e han mess al WEF la basa per la reconstrucziun da l'Ucraina – in resultat concret.

Plinavant sajan era vegnidas discutadas autras crisas globalas. La crisa dal clima, e la pandemia da corona, che fatschenta il mund dapi dus onns èn era stads temas impurtants. In inscunter sco il WEF, cun tantas persunalitads da politica, economia e societad n'haja daditg betg pli dà.

Or da la vista da la branscha da turissem saja stà in WEF excellent. Quai ha ditg Reto Branschi, il directur da l'uniun turistica, envers RTR. Ins sfida saja stà da chattar il persunal necessari, per avrir ils hotels durant la stagiun morta. Experts stiman, ch'il WEF haja creà valur agiuntada da radund 60 milliuns francs.

Facit positiv da chantun e polizia

L'emprima ediziun dal WEF la primavaira saja stada ruassaivla. La collavuraziun dals differents servetschs haja funcziunà e tut las mesiras sajan sa cumprovadas. Uschia il facit da la regenza grischuna. Las demonstraziuns a Tavau, sco era la spassegiada da primavaira da Küblis a Tavau sajan stadas paschaivlas.

video
Facit positiv dal WEF dal chantun
Or da Telesguard dals 26.05.2022.
laschar ir. Durada: 1 minuta 8 Secundas.

En tut èn sa participadas 85 persunas protegidas dal dretg internaziunal public al WEF, tranter auter era sis cussegliers e cusseglieras federalas. Pervi da la situaziun da smanatscha actuala haja dà, sco gia ils davos onns, dapli controllas e dapli exploraziun.

«Open Forum probablamain vegnì sabotà»

Il directur dal WEF Alois Zwinggi suppona in'acziun da sabotascha tar l'Open Forum da quest onn. Oriundamain hajan ins vulì annullar il forum, perquai ch'i haja dà smanatschas da mort. Per las occurrenzas a l'Open Forum han persunas interessadas stuì sa preannunziar online. Per part eran las occurrenzas reservadas fin a 70%, ha Zwinggi ditg a l'agentura da novitads Keystone-SDA. Uss han ils referats dentant strusch gì participants.

RTR novitads 18:00

Artitgels legids il pli savens