Siglir tar il cuntegn

Exteriur Zuma vegna relaschà da l'uffizi

En l'Africa dal Sid ha la partida da la regenza ANC decis da relaschar il schef da stadi dispitaivel Jacob Zuma, quai rapportan medias localas. La decisiun saja crudada suenter ina sesida da 13 uras. Ina conferma uffiziala na datti il mument anc betg.

Purtret da Jacob Zuma.
Legenda: Jacob Zuma, ils schef da regenza sidafrican è tenor medias localas relaschà da l'uffizi. Keystone

Currellas tenor las qualas Zuma saja sa retratg, na constettian betg, ha ditg in pledader da Zuma anc durant la sesida. La pagina da novitads News24 ha cità funtaunas, tenor las qualas Zuma vegnia mess destituì, suenter ch'el haja refusà da libra veglia.

Il president sidafrican stat en il center da renfatschas da corrupziun massivas. Tranter auter vai per ina fatschenta da milliardas en connex cun l'armaziun. Zuma sez refusa las renfatschas e vul restar en uffizi.

En sasez cuzza sia perioda d'uffizi fin mez 2019

Il president da la partida ANC e vicepresident, Cyril Ramaphosa, ha annunzià dumengia ch'il gremi vegnia ad agir en l'interess da la naziun e ch'el veglia instradar uschè svelt sco pussaivel la surdada da la pussanza. Ramaphosa vala sco successur probabel da Zuma. El aveva remplazzà Zuma il december a la testa da la partida. Uffizialmain cuzzass la perioda d'uffizi da Zuma anc enfin mez 2019.

RR novitads 09:00