Siglir tar il cuntegn

Exteriur Zuma remetta ses uffizi per immediat

Il president da l'Africa dal Sid Jacob Zuma ha suenter squitsch tras sia partida remess ses uffizi per immediat. Ses successur duai vegnir saramentà bainprest.

Jacob Zuma.
Legenda: Jacob Zuma n'è betg pli president da l'Africa dal Sid. Keystone
  • Il president da l’Africa dal Sid Jacob Zuma remetta per immediat ses uffizi, quai suenter che sia partida la ANC ha fatg squitsch.
  • Cun remetter l’uffizi vegn Zuma (75) da guntgir in votum da disfidanza dal parlament planisà.
  • Cyril Ramaphosa duai gia vegnir saramentà questa gievgia sco nov president da l'Africa dal Sid.

Il president Zuma ha era crititgà sia partida ch’ella pretendia sia demissiun immediata. Tuttina s’adatteschia el a la voluntad da la partida. La demissiun da Zuma fa uss via libra a Cyril Ramaphosa che duai gia vegnir saramentà il decurs da la gievgia. Quai ha annunzià il schef da fracziun da la partida da regenza ANC. Oriundamain eri previs che Ramaphosa vegnia saramentà il venderdi.

Renfatschas da corrupziun

Zuma era vegni sut squitscha gia in temp pervi dal suspect da corrupziun. El haja surdà a famiglias che mainan interpresas pliras fatschentas e uschia surdà pussanza politica ad ellas. Malgrà questas renfatschas n’è Zuma fin uss betg vegnì accusà. El refusa tut las renfatschas.

RR novitads 23:00