- Suenter la catastrofa da tsunami è rut or in vulcan sin l'insla Sulawesi.
- Il vulcan ch'è bunamain 1'800 meters aut bitta tschendra en autezza da fin quatter kilometers.
- Davart donns na datti anc naginas indicaziuns uffizialas.
Il vulcan Soputan ha bittà tschendra en in'autezza da fin 4 km. Tenor l'autoritad naziunala da la protecziun da catastrofas na datti fin uss naginas infurmaziuns davart donns pli gronds. Il vulcan è en il nordost da l'Indonesia, plirs tschient kilometers davent dal territori da la catastrofa da tsunami. La tschertga da las unfrendas dal tsunami vegn entant adina pli desperada. En las ruinas da chasas vegnan anc bleras ulteriuras baras sminadas.
Situaziun nunsurvesaivla
Fin uss n'è la dimensiun da la catastrofa anc betg dal tuttafatg clera. Tenor l'autoritad naziunala da la protecziun da catastrofas dovri quai anc plirs dis. Passa 800 persunas sajan vegnidas blessadas. Passa 60'000 persunas hajan pers lur dachasa. Las Naziuns Unidas supponan che passa 190'000 persunas dovrian agid en la regiun pertutgada.
Chadaina da Fortuna rimna
Venderdi, ils 7 d'october rimna la Chadaina da Fortuna ensemen cun la SRG SSR daners per las victimas dal tsunami en l'Indonesia.
RR novitads 07:00
