Visita en il Vatican – Vitus Huonder tar il papa

L’uvestg da Cuira è stà ad in’audienza tar il papa a Roma – exactamain al 80avel anniversari da papa Francestg.

Per il papa saja dentant ses 80avel anniversari in di sco tut ils auters er. Avant l’inscunter cun l’uvestg da Cuira ha il papa gia absolvì in’audienza cun la presidenta da la republica da Malta e cun il prefect da la Congregaziun per ils uvestgs. Suenter era l’audienza per l’uvestg da Cuira. En quell’occasiun ha Vitus Huonder regalà al papa ina reliquia dal sontg frar Clau da Flia (Niklaus von Flüe).

En il focus da l’interess stat actualmain la successiun da l’uvestg da Cuira. Vitus Huonder vegn l’onn proxim 75 onns e stuess dar en sia desditga sco uvestg. Tge che succeda dentant propi n’è betg anc vegnì publitgà.

Laschar ir video «Co tscherner in nov uvestg?»

Co tscherner in nov uvestg?

1:08 min, dals 17.12.2016

Sche la successiun a Cuira era er tema a l’inscunter cun papa Francestg n’è dentant betg enconuschent - e na vegn strusch a vegnir enconuschent. Da quai ch'ins discurra tar in audienza cun il papa na discurr'ins para betg, uschia Giuseppe Gracia, il pledader da l'uvestg da Cuira, che ha mo confermà, ch’il discurs haja gì lieu.

RR novitads 17:00