Siglir tar il cuntegn

Header

cuntegn

Visita dispitaivla en Taiwan La China smanatscha puspè cun exercizis militars

La China reagescha puspè cun exercizis militars suenter che in’ulteriura delegaziun americana ha visità il Taiwan. Il viadi da las politicras e politichers americans violeschia la suveranitad e l’integritad territoriala da la China.

Avant in'emna aveva la China annunzià che ses exercizis militars enturn il Taiwan sajan terminads - quai suenter exercizis durant radund in'emna. Il Taiwan aveva communitgà che pliras navs chinaisas hajan surpassà la lingia da cunfin en la mar tranter l'insla da Taiwan e la terra ferma da la China. En pli sajan stads plirs eroplans chinais en acziun.

La China haja simulà cun quests exercizis in'attatga sin il Taiwan. Il Taiwan haja reagì cun sgols d'exploraziun e patruglias da la marina.

Il motiv: Il status contestà dal Taiwan

Ils Stadis Unids renconuschan il Taiwan sco stadi independent. Per la China è l’insla dentant ina provinza malfidaivla. Ils manevers avevan cumenzà sco reacziun sin la visita da la politicra dals Stadis Unids, Nancy Pelosy, a Taipeh. Pervia da las tensiuns ha la China era interrut la collavuraziun e discurs en differents secturs cun ils Stadis Unids.

Or da l'archiv:

video
China simulescha attatga sin il Taiwan
Or da Tagesschau dals 06.08.2022.
laschar ir. Durada: 1 minuta 52 Secundas.

RTR novitads 20:00

Artitgels legids il pli savens