Siglir tar il cuntegn
Inhalt

Exteriur Violenza tranter Palestinais ed Israelians crescha

Tar confruntaziuns en la regiun da cunfin da la Strivla da Gaza hai dà nov morts e passa 1'300 blessads.

Palestinais che protestan e fim nair davostiers.
Legenda: Protests da Palestinais en la Strivla dal Gaza. Keystone

Radund 20'000 Palestinais han protestà il venderdi per lung dal cunfin da la Strivla da Gaza cun l'Israel. Tenor indicaziuns da l'armada israeliana hajan els en blers lieus dà fieu a pneus. I haja dà pliras emprovas da donnegiar la saiv da cunfin e da metter chargias explosivas.

Var 500 blessads da sajets

En il decurs dals protests èn 9 persunas mortas. Tranter quels sajan er in giuvenil da 16 onns ed in schurnalist palestinais. tranter ils passa 1'300 blessads sajan er dunnas ed uffants. Dals blessads hajan radund 500 persunas blessuras da sajets, annunzia l'uffizi da sanadad da Gaza. Blers auters han sa lamentà da malesser suenter il diever da gas lacrimogen. Ed er tranter ils blessads sajan schurnalists palestinais.

Protests duran sis emnas

En tut han almain 31 persunas pers la vita, dapi il cumenzament dals protests avant in'emna. Pli che 2'800 persunas èn vegnidas blessadas. Ils protests duain anc cuzzar fin mez matg. l'Israel festivescha ils 14 da matg ch'il stadi è vegnì fundà avant 70 onns. Il medem di duai l'ambassada americana sin decret dal president american Donald Trump far midada a Jerusalem.

RR novitads 12:00