Siglir tar il cuntegn
cuntegn

Exteriur Victur indiscutabel tar l'elecziun decisiva dals conservativs

L’anteriur primminister François Fillon è il candidat dals conservativs per la cursa al palazi da l’Elysée.

Dus umens en cravatta.
Legenda: François Fillon è stà il candidat fortunà dals conservativs. Alain Juppé (davos a sanestra ) ha tratg la curta. Keystone

Ussa èsi cler. François Fillon è il candidat dals conservativs per las elecziuns presidenzialas da la primavaira che vegn en Frantscha. Suenter che bundant dus terzs da las vuschs èn dumbradas ora ha el obtegnì bunamain 70% da las vuschs, ha communitgà la cumissiun electorala. Ses concurrent Alain Juppé ha obtegni 30% da las vuschs ed ha gia acceptà sia terrada.

Per mesiras radicalas

François Fillon pledescha per refurmas radicalas en la politica economica e sociala. Plinavant vul el avair meglras relaziuns cun la Russia.

Etappa fitg impurtanta

Las elecziuns presidenzialas èn previsas per l’avrigl e matg che vegn. Las elecziuns preliminaras dals conservativs vegnan visas sco etappa fitg impurtanta. «Il victur da las elecziuns preliminaras è davent da damaun il favurit da las proximas elecziuns presidenzialas», ha scrit la gasetta «Journal de Dimanche».

Per las elecziuns presidenzialas da l’onn che vegn vegn attestà als conservativs bunas schanzas. Tenor enquistas pudess lur candidat fruntar sin la populista da la dretga Marine Le Pen dal Front National.