Siglir tar il cuntegn

Header

cuntegn

Exteriur Vice-primminister britannic sa retira

En la Gronda Britannia è il vice-primminister Damian Green sa retratg suenter las renfatschas d'abus sexual. Quai communitgescha il biro da la primministra Theresa May a Londra.

Il pli impurtant en curt:

  • Damian Green, vice-primminister da la Gronda Britannia, substitut da la primministra Theresa May, ha stuì dar enconuschent mesemna saira sia retratga.
  • L'um da 61 onns è vegnì sut squitsch pervia da rapports davart material pornografic ch'ins aveva chattà sin in computer en ses biro.
  • Cunter el eran era vegnidas instradadas examinaziuns internas pervia da renfatschàs da mulesta sexuala.

Cuntrafatg al codex da cumportament per ministers

Las inquisiziuns da la regenza britannica hajan mussà che Damian Green haja cuntrafatg al codex da cumportament per ministers. Qua rapporta l'emettur BBC London. Il 2008 aveva la polizia chattà material pornografic sin in computer en ses biro. Green aveva pretendì d'avair savì nagut da quai, quai ch'el ha pli tard però stuì reveder.

Renfatschas pervia da mulesta sexuala

Las inquisiziuns eran vegnidas instradadas suenter ch'ina schurnalista aveva renfatschà ad el mulesta sexuala. Ils inquisiturs han taxà quai sco vardaivel.

L'entschatta november era gia il minister da defensiun britannic Michael Fallon sa retratg pervia da renfatschas da mulesta sexuala. Silsuenter hai adina puspè renfatschas da mulesta en il parlament.

Amicizia durant decennis cun May

Il politicher da 61 onns valeva sco allià fitg stretg da Theresa May, els collia ina amicizia durant decennis. Els han prendì d'enconuscher ils onns 70 en l'Universitad Oxford, nua che May ha studegià geografia cun Alicia Collinson, la dunna da Green. La carriera politica da Damain Green ha cumenzà ils onns 90.

RR novitads 06:00

Artitgels legids il pli savens