Venezuela: violenza massiva e sistematica cunter demonstrants

Tenor indicaziuns da la Naziuns Unidas, ONU, dovra la regenza violenza massiva e sistematica cunter demonstrants.

militiar venezolan che protegia ina basa militara cunter protestas

Legenda da maletgs: Tenor las Naziuns Unidas duai la regenza duvrar violenza massiva e sistematica cunter demonstrants. Keystone

Plinavant haja ina gruppa d’experts constatà torturas e arrestaziuns arbitraras, rapporta l’ONU. Dapi l’avrigl datti massivas protestas cunter il president Nicolas Maduro. Tenor indicaziuns uffizialas èn 120 persunas mortas, tenor ina analisa da l’ONU èn la polizia e las forzas da segirtad responsablas per la mort da 73 persunas.

Crisa politica s'intensivescha

Il parlament sa dosta cunter la privaziun da sia pussanza. Unanimamain han ils delegads decis che l’Assamblea constituenta saja illegala. Silsuenter han commembers da l’Assamblea constituenta attatgà il parlament cun agid da schuldada. Quai ha communitgà l’opposiziun ch’ha la maioritad en il parlament venezolan.

Il president Nicolas Maduro vul remplazzar il parlament tras l’Assamblea constituenta che sa cumpona d’aderents dad el. Tant l’Uniun europeica sco er ils Stadis Unids crititgeschan l’assamblea dispitaivla. Ils Stadis Unids vulan rinforzar las sancziuns cunter la Venezuela. Quai rapportan circuls da la regenza.

RR novitads 15:00