Siglir tar il cuntegn
Inhalt

Exteriur Venezuela: Maduro defenda per tut pretsch revoluziun socialista

Suenter 20 onns revoluziun saja el pront per in nov pass istoric. En vista als protests sanguinus cun gia 21 morts ha el segirà ch'il pajais na vegnia betg a vegnir en ina guerra civila.

Purtret da dus giuvens che stattan davant ina parait cun scrit si il pled «Resistencia», resistenza.
Legenda: Duas persunas che han fatg part dals protest da sonda. Là eran vegnidas commemoradas ils morts da protests precedents. Keystone

Maduro vegn crititgà fermamain, perquai ch'el vul equipar 500'000 milissas cun armas. Ils adversaris politics appelleschan al militar da sa distanziar da Maduro.
Cun danovamain tschientmillis demonstrants vul l'opposiziun ir sin via cunter il presidi da Maduro. Il vicepresident dal parlament, Freddy Guevara ha annunzià protests en tut ils 24 stadis federal dal pajais cun las pli grondas reservas d'ieli dal mund.

1'300 arrestaziun dapi l'entschatta dal mais

Dapi l'entschatta dals protests ils 4 d'avrigl 2017 hai dà radund 1'300 arrestaziuns. Motiv per questas era ch'il parlament che vegn regì da l'opposiziun era vegnì privà da la pussanza. Uschia han ins temì da crudar en ina dictatura.

En il passà hai da pliras emprovas da dialog tranter ils socialists e l'opposiziun che n'han dentant betg purtà fritg. Madura rinfatscha a l'opposiziun, che ha cleramain gudagnà las elecziuns da parlament il 2015, da vulair in putsch.

Il parlament è il mument quasi senza pussanza damai che Maduro regia il mument cun l'agid da la giustia e cun decrets da stadi d'urgenza. Uschia vegn el da guntgir la legislativa.

Adina dapli violenza

Malgrà las reservas d'ieli ch'il pajais ha sa chatta la Venezuela il mument en la pli gronda crisa da provediment da sia istorgia. La regenza declera quai cun il pretsch d'ieli ch'è sa sbassà. Colonnas davant centers da cumpra e persunas che tschertgan mangiativas en il rument è gia daventà normal. Plinavant datti er adina dapli violenza en il pajais. L'onn 2016 èn 28'500 persunas vegnidas assassinadas.

RR novitads 10:00