Siglir tar il cuntegn
cuntegn

Exteriur «Venezuela è ina bumba»

Quai pretenda almain l'opposiziun en vista a la situaziun tendida en il pajais sidamerican. Ella pretenda dal president da resguardar la veglia dal pievel per evitar revoltas socialas.

Dunna cun in placat.
Legenda: Ils protests cunter la regenza venezolana vegnan pli e pli intensivs. Keystone

En la Venezuela han opponents da la regenza avertì il president Nicolas Maduro da revoltas dal pievel. La Venezuela saja ina bumba che pudess explodir mintga mument – ha ditg il manader da l’opposiziun Henrique Capriles a Caracas.

L’opposiziun, ch’ha la maioritad en il parlament, vul anc quest onn destituir Maduro sco president. Ella ha gia rimnà radund 1,8 milliuns suttascripziuns per in referendum correspundent. Però ha l’uffizi d’elecziun laschà scader venderdi passà il termin da controllar questas glistas.

Maduro prepara intervenziun militara

Il president venezolan Nicolas Maduro ha annunzià a manar tras manevers militars. Ad ina manifestaziun d’aderents da la regenza ha el declerà da vulair preparar il pajais sin mintg’eventualitad.

La Venezuela stat avant il bancrut. Ella ha da cumbatter cun ina da las pli autas inflaziuns dal mund ed in dischurden economic.

RR novitads 06:00 / 10:00