Siglir tar il cuntegn
Inhalt

Exteriur Venezia e Lumbardia voteschan per dapli autonomia

En l'Italia dal Nord sa decleran las duas regiuns Venezia e Lumbardia sco victuras dals dus referendums per dapli autonomia. I va per dapli cumpetenzas, cunzunt quai che pertutga las taglias. Uss dovri tractativas cun la regenza a Roma.

Luca Zaia a l'urna.
Legenda: Il president da la Venezia, Luca Zaia, dat giu sia vusch. Keystone

Dumengia han las duas regiuns las pli ritgas da l'Italia – la Lumbardia e la Venezia – gì da votar davart in referendum per dapli autonomia.

En la Venezia han tenor calculaziuns approximativas var 98% da la glieud detg gea per dapli autonomia. La participaziun saja stada tar bunamain 60%.

Cuntanschì finamira. Per la Venezia cumenza ina nova istorgia.
Autur: Luca Zaia

Quai ha il president regiunal da la regiun, Luca Zaia, communitgà via Facebook. El ha dentant era orientà davart ina probabla attatga da hackers sin la regenza regiunala tar la dumbraziun da las vuschs. Perquai pudessi esser che la publicaziun dals resultats sa retardescha.

En la Lumbardia han tenor calculaziuns approximativas enturn 95% da las persunas vuschà cun gea. Quai ha il president da la regiun, Roberto Maroni, declerà. La participaziun a las elecziuns saja stada cun 40% pli auta che quintà.

Ils resultats uffizials dals dus referendums n'èn anc betg avant maun.

Taglia duai restar en la regiun

Auter che la regiuna Catalugna en la Spagna vulan la Lumbardia e la Venezia betg dapli independenza dal stadi central. Lur finamira primara è che ina gronda part da lur taglias restia en la regiun.

RR novitads 06:00