Siglir tar il cuntegn
cuntegn

Exteriur Uss passa 200 milliuns – la dischoccupaziun mundiala crescha

Quest onn vegnan per l’emprima giada passa 200 milliuns persunas ad esser senza lavur sin tut il mund. In augment nodan cunzunt novs pajais industrials.

Blera glieud da l'Indonesia
Legenda: La dischoccupaziun enconuscha era la glieud da l’Indonesia. Reuters

La quota da dischoccupaziun globala vegnia a crescher sin 5,8% il 2017. Quai sajan 0,1% u 3,4 milliuns dischoccupads dapli che l'onn passà, scriva l'Organisaziun internaziunala da la lavur ILO en ses nov rapport. Las raschuns per quest augment sajan il svilup dischillusiunant da l'economia mundiala e las malsegirtads politicas.

Dapli dischoccupads vegn quai cunzunt a dar quest onn en ils novs pajais industrials sco il Mexico, la Brasilia e l’Africa dal Sid. En ils pajais industrials vegn quintà cun pli paucas persunas senza lavur.

In impurtant med cunter la dischoccupaziun mundiala è tenor la ILO il cumbat cunter l’economia zuppada. I dovria dapli pass per limitar las perditas che derivian da quest’economia illegala.

RR novitads 12:00