La critica ch'è suandada l'uschenumnada crisa da fugitivs il 2015 e 2016 è stada gronda, er davart l'atgna partida. L'anteriura chanceliera tudestga aveva avert ils cunfins per fugitivs e fugitivas da la Siria che vegnivan sur il Balcan.
L'autcumissariat per fugitivs da las Naziuns Unidas UNHCR ha perquai undrà Merkel. La Germania haja prendì si durant quest temp passa 1,2 milliuns persunas. Merkel saja stada il motor per gidar a s'integrar fugitivas e fugitivs cun scolaziuns e plazzas da lavur. Ella survegn perquai il Premi Nansen, numnà suenter Fridtjof Nansen ch'è s'engaschà suenter l'emprima guerra mundiala per fugitivs.
Il premi è dotà cun 148'000 francs e vegn surdà glindesdi, ils 10 d'october, a Genevra. Merkel vegn a prender encunter el sezza.
